Տարեց կնոջ սպանությունը բացահայտվեց

● Լրահոս

09.08.2013 ● 13:06

Տարեց կնոջ սպանությունը բացահայտվեց

Հուլիսի 19-ի ժամը 19։25-ին ոստիկանության Երևան քաղաքի վարչության օպերատիվ կառավարման կենտրոնում մի տղամարդուց հաղորդում էր ստացվել, որ գնացել է բարեկամուհուն տեսակցության` Էմինեսկուի փողոցի թիվ 19/Ա տուն, բայց տանտիրուհին չի արձագանքել իր զանգերին: Մտնելով տուն` նկատել է, որ տան իրերը ամբողջությամբ խառնված են, իսկ տարեց տանտիրուհին սպանված է:

Պարզվել էր, որ հուլիսի 18-ի ժամը 21։00-ից հուլիսի 19-ի ժամը 19։25-ն ընկած ժամանակահատվածում անհայտ անձը պատշգամբի դռնից մտել է Էմինեսկուի 2-րդ փողոցի թիվ 19/Ա տուն և խեղդելով սպանել 1938թ. ծնված Անյա Մուսայելյանին, խառնել տան իրերը և դիմել փախուստի:

Օգոստոսի 8-ին՝ ժամը 23։00-ին, ոստիկանության Քանաքեռ-Զեյթունի բաժնի ծառայողները, Երևան քաղաքի վարչության, քննչական բաժնի և ՊՊԾ գնդի ծառայողների հետ համատեղ, սպանությունը կատարելու կասկածանքով, Լոռու մարզի Ախթալա քաղաքի Աբովյան փողոցի 23 շենքի բնակարաններից մեկից բերման են ենթարկել 1988թ. ծնված Արթուր Շ.-ին:

Ձեռնարկված օպերատիվ-հետախուզական և քննչական միջոցառումների շնորհիվ պարզվել է, որ Արթուր Շ.-ն հուլիսի 19-ին՝ ժամը 06։30-ի սահմաններում, բաց դռնից մտել է Էմինեսկուի 2-րդ փողոցի թիվ 19/Ա տուն, խեղդելով սպանել է Անյա Մուսայելյանին, հափշտակել 2.700 դոլար և ոսկյա զարդեր:

Արթուր Շ.-ն ձերբակալված է:

Ձեռնարկվում են միջոցառումներ հափշտակվածը հայտնաբերելու ուղղությամբ:

ՀՀ քրեական օրենսգրքի 104 հոդվածի 2-րդ մասի 8-րդ կետի և 175 հոդվածի 2-րդ մասի 3-րդ կետի հատկանիշներով հարուցված քրեական գործի նախաքննությունը շարունակվում է: