Երբ Սերժ Սարգսյանը իշխանական կոմսոմոլի՝ բազեականների, հետ հանդիպման ժամանակ ցանկություն հայտնեց, որ Ադրբեջանում վերընտրվի Իլհամ Ալիևը, արդեն իսկ պարզ էր, որ խիարը կրկին թարս է բուսնելու։

Ալիևի պատասխանն իրեն երկար սպասեցնել չտվեց։

«Որքան երկար Հայաստանի իշխանության ղեկին մնա ներկայիս ղեկավարությունը՝ Սերժ Սարգսյանի նախագահությամբ, այնքան արագ մենք կկարողանանք վերադարձնել մեր հողերը: Այդ մարդն ու իր շրջապատը Հայաստանը դեպի անդունդն են տանում: Համաձայն նրանց սեփական պաշտոնական վիճակագրության`ամեն տարի 80 հազար հայ լքում է երկիրը: Եթե այդպես գնա, ապա 5-6 տարի հետո Հայաստանում մնալու է մեկ միլիոնից էլ պակաս մարդ»,– հայտարարել է Ադրբեջանի նախագահը։

Փաստորեն, Սարգսյանն ու Ալիևը փոխադարձաբար ցանկանում են դիմացինին տեսնել նախագահի աթոռին։ Բայց եթե Սերժ Սարգսյանի ցանկությունն անմեղսունակության, անարժանապատվության և նախկին շեֆի որդուն քծնելու ենթագիտակցական մղման հետևանք է, ապա Իլհամ Ալիևը շատ կոնկրետ նպատակով է ուզում, որպեսզի Սերժը մնա ՀՀ նախագահի պաշտոնում։

Ստացվում է, որ Սարգսյանի ու Ալիևի շահերը և ցանկություններն ամբողջությամբ համընկնում են։ Ցավալին այն է, որ այդ համընկնումից շահում է միայն Ադրբեջանը, քանզի Ալիևը ճիշտ է՝ եթե Սարգսյանը երկար մնա իշխանության ղեկին, ապա մենք սարսափելի կորսուտներ կունենանք։ Եկե՛ք, ուրեմն, «Ո՛չ» ասենք Սարգսյանին կամ, որ նույնն է, Ալիևի ցանկությանը։

Սևակ Մինասյան