ՀՀ պաշտպանության նախկին փոխնախարար, Հայ ազգային կոնգրեսի անդամ Վահան Շիրխանյանը լրագրողներին ասել է, որ վերջերս գաղտնազերծված Մադրիդյան սկզբունքները հակահայ են, կահահայաստանյան և հակաարցախյան, իսկ այնտեղ ամրագրված զիջումները պարտադրվում են միայն Հայաստանին։ Ավելին, նա նշել է, որ Մադրիդյան սկզբունքները գրեթե նույնն են, ինչ 1998թ. ցանկանում էր իրականցնել այն ժամանակ ՀՀ նախագահ Լևոն Տեր-Պետրոսյանը, ինչն էլ նրա հրաժարականը պահանջելու պատճառ դարձավ։

-Չընդունվեց մեր կողմից։ Մենք ասացինք, թե սա պարտություն և դավաճանություն է, և նա հեռացավ։ Հիմա էլ ես չեմ ասում՝ Սե՛րժ Սարգսյան, դու հեռացի՛ր, Լևո՛ն Տեր-Պետրոսյան, դո՛ւ արի,- ասել է Վ. Շիրխանյանը՝ հավելելով, որ երկրում սահմանադրական կարգը վերականգնելուց հետո ՀՀ առաջնորդ տեսնում է այն մարդուն, ում կընտրի ժողովուրդը։ Իսկ եթե, այդուհանդերձ, ընտրի Լևոն Տեր-Պետրոսյանին, և նա կրկին ցանկանա իրականացնել նույնը, ինչ 1998թ., ապա այդ ժամանակ կրկին կպայքարեն Լևոն Տեր-Պետրոսյանի դեմ։

-Մենք Ադրբեջանին ոչ մի թիզ հող չունենք հանձնելու։ Հանձնել՝ նշանակում է կորցնել Հայաստանը,- ասել է Վ. Շիրխանյանը՝ ղարաբաղյան հակամարտության կարգավորման հարցում Հայ ազգային կոնգրեսի ղեկավարի և մի շարք անդամ-կուսակցությունների հետ նույնիսկ նման հակադիր դիրքորոշումներ ունենալու պարագայում ՀԱԿ-ում իր մնալը բացատրելով հետևյալ կերպ.

-Ես շարքային կոնգրեսական եմ, որը մարտի 1-ի սպանդով ջղայնացած, վիրավորված՝ ընդունվել է այդտեղ, որպեսզի կարողանա կազմակերպված պայքարել այս իշխանության դեմ։

7or.am