Հայտնի երգչուհի Քեթի Փերիի «Roar» տեսահոլովակը ոչ միայն դրական արձագանքներ է ստացել, այլ նաև մեծ աղմուկ բարձրացրել կենդանասերների շրջանում: Կենդանիների պաշտպանության համաշխարհային «PETA» կազմակերպությունը պաշտոնական նամակ է ուղղել Փերիին, որտեղ մեղադրում է երգչուհուն տեսահոլովակի նկարահանման ժամանակ կենդանիներին սթրեսի ենթարկելու համար:

«Գուցե դուք տեղյակ չեք, սակայն կենդանիների շահագործումը ժամանցային հաղորդումներում, այդ թվում՝ տեսահոլովակներում և ֆիլմերում, կարող է լուրջ վնաս հասցնել նրանց հոգեվիճակին, քանի որ նկարահանումների ժամանակ կենդանիներին ենթարկում են անթույլատրելի վարժեցման»,–ասված է «PETA»-ի հայտարարության մեջ:

Ի պատասխան մեղադրանքների` Փերին հայտարարել է, որ տեսահոլովակի նկարահանմանը ներկա են գտնվել «American Humane Association»-ի ներկայացուցիչները, ովքեր ուշադիր հետևել են, որպեսզի պահպանվեն կենդանիների հանդեպ վերաբերմունքի բոլոր կանոնները: