Այսօր՝ ժամը 14։00–ին, ՀՀ գլխավոր դատախազության մոտ բողոքի հերթական գործողությունը տեղի կունենա։

Վերջինի կազմակերպիչների հայտարարության մեջ ասվում է. «2011թ. օգոստոսի 9-ին Հայ ազգային կոնգրեսի ակտիվիստների և ոստիկանության աշխատակիցների միջև տեղի ունեցած միջադեպից հետո մինչ օրս շարունակվում է Հայ ազգային կոնգրեսի ակտիվիստների նկատմամբ քաղաքական հետապնդումը: Վերջիններս դատապարտվեցին 2-6 տարվա ազատազրկման:

Կալանավորված Տիգրան Առաքելյանի, իսկ վերոնշյալ դատավճռի իրավական ուժի մեջ մտնելուց հետո նաև Սարգիս Գևորգյանի, Դավիթ Քիրամիջյանի և Արտակ Կարապետյանի կարգավիճակն ամբողջությամբ համապատասխանում է ընթացիկ տարվա հոկտեմբերի երեքին Եվրախորհրդի խորհրդարանական վեհաժողովի 1900 բանաձևով հաստատված «քաղբանտարկյալ» ձևակերպմանը:

Ու թեև դատավճիռը դարձել է հասարակական դժգոհության պատճառ և դատապարտվել է իրավապշտպան «Երիտասարդություն հանուն ժողովրդավարության», «Հելսինկյան քաղաքացիական ասամբլեայի հայկական կոմիտե», Իրավունքի և ազատության կենտրոն, Ժուռնալիստների «Ասպարեզ» ակումբ, «Համագործակցություն հանուն ժողովրդավարության», «Հելսինկյան քաղաքացիական ասամբլեայի Վանաձորի գրասենյակ», «Թրանսփարենսի ինթերնեշնլ հակակոռուպցիոն կենտրոն» հասարակական կազմակերպությունների, մի շարք քաղաքական կազմակերպությունների` «Բարգավաճ Հայաստան», «Ժառանգություն», «Հայ հեղափոխական դաշնակցություն», «Ազատ դեմոկրատներ» կուսակցությունների երիտասարդական թևերի, ինչպես նաև «Եվրոպայի լիբերալ երիտասարդներ»-ի կողմից, իշխանություններն, այնուամենայնիվ, շարունակում են հանցավոր համառություն ցուցաբերել այս հարցում:

Բերման ենթարկման առաջին իսկ րոպեներից երիտասարդների իրավունքների կոպտագույն խախտումները, բազմաթիվ ապօրինությունները` սուտ ցուցմունքներ, ապացույցների բացակայություն, ոչ պատշաճ քննություն, կողմերի անհավասարություն և այլն, որ տեղ են գտել ողջ դատաքննության ընթացքում, վառ ապացույցն են այն բանի, որ երիտասարդները ենթարկվում են Սերժ Սարգսյանի հանցախմբի կողմից պատվիրված քաղաքական հետապնդման:

Անթույլատրելի համարելով քաղաքացիների նկատմամբ քաղաքական հետապնդումներն ու քաղբանտարկյալների առկայությունը Հայաստանում` գտնում ենք, որ Կոնգրեսի երիտասարդների նկատմամբ իշխանությունների սանձազերծած արշավը մարտահրավեր է ողջ հանրությանը:

Կոչ ենք անում քաղաքական կուսակցությունների, հասարակական կազմակերպությունների, քաղաքացիական նախաձեռնությունների անդամներին, Հայաստանն առանց քաղբանտարկյալների տեսնել ցանկացող քաղաքացիներին ակտիվորեն մասնակցել բողոքի միջոցառումներին»: