Հավաքական անվտանգության պայմանագրի կազմակերպության (ՀԱՊԿ) որևէ օրենքով չի արգելվում Ադրբեջանին Ռուսաստանի կողմից զենքի վաճառքը։ Այս մասին այսօր ԱԺ–ում ՀԱՊԿ խորհրդարանական վեհաժողովի պաշտպանության և անվտանգության հարցերով մշտական հանձնաժողովի փակ նիստից հետո լրագրողներին ասել է հանձնաժողովի նախագահ, ՌԴ Պետդումայի ներկայացուցիչ Անատոլի Վիբորնին։

«Այն, որ մենք ՀՀ-ի տարածքում ենք անցկացնում այս նիստը, արդեն վկայում է այն մասին, որ մենք անհանգստանում ենք տարածաշրջանում տեղի ունեցող զարգացումներով: ՌԴ-ն առավելագույնս անում է ամեն ինչ, որպեսզի որևէ երկրի կողմից չլինի սպառնալիք: ՀԱՊԿ անդամ բոլոր երկրները պետք է գործեն միմիայն իրավական դաշտում»,-նշել է նա։

ՀՀԿ պատգամավոր, ՀԱՊԿ պատվիրակության խորհրդական Խոսրով Հարությունյանն էլ ասել է, որ վերջնական համաձայնագրում բոլոր հուզող հարցերը ներառված կլինեն, այդ թվում՝ ԼՂ հակամարտության վերաբերյալ։

Նշենք, որ մամուլի ասուլիսը սկսվել է ռուսերեն, որն առաջացրել է ԱԺ պատգամավոր Խաչատուր Քոքոբելյանի դժգոհությունը։