ՀՅԴ պատգամավոր Վահան Հովհաննիսյանին Գերմանիայում դեսպան նշանակելու հետ կապված թեմայով դեռևս նորություն չկա։ Համենայնդեպս, ՀՀ փոխարտգործնախարար Շավարշ Քոչարյանը դրանցից տեղյակ չէ։

Այդ մասին նա ասել է «7օր»–ի հարցին ի պատասխան՝ միաժամանակ տարօրինակ չհամարելով ագրեմանի հաստատման ընթացակարգի այսքան ձգձգումը։

–Ագրեմանները՝ որպես կանոն, այնպես չէ, որ շատ արագ են գալիս, այնպես որ, ես որևէ մեկնաբանություն չունեմ,–նշել է փոխարտգործնախարարը։

Թե ի՞նչ արժանիքների համար են հենց Վահան Հովհաննիսյանին առաջարկել դեսպանի պաշտոնը, Շ. Քոչարյանը հրաժարվել է մեկնաբանել.

–Նախ՝ դա նախագահն է որոշում, որովհետև դեսպանի նշանակումը նախագահի՛ մենաշնորհն է։ Այնպես որ, հարցը կարող եք ուղղել հանրապետության նախագահին։

«7օր»–ի թղթակիցը Շ. Քոչարյանից հետաքրքրվել է նաև՝ արդյոք իշխանություններին չի՞ կոմպլեքսավորում այն հանգամանքը, որ որոշ ժամանակ առաջ Վահան Հովհաննիսյանը պահանջում էր ՀՀ ԱԳ նախարար Էդվարդ Նալբանդյանի հրաժարականը։

–Ի՛նձ ոչ մի բան չի կոմլեքսավորում, և ընդհանրապես, մի բան է ներքին կյանքը, այլ բան՝ արտաքին հարաբերություններում հանդես գալը մեկ միասնական ճակատով։ Եվ մենք միշտ դրան պետք է ձգտենք,–պատասխանել է Շ. Քոչարյանը և շտապել հեռանալ։

7or.am