Վրաստանի նորընտիր նախագահ Գեորգի Մարգվելաշվիլին Վազիանիի ռազմակայանում զինվորականների հետ հանդիպման ժամանակ ասել է, որ Վրաստանը բոլոր խնդիրները կլուծի խաղաղ ճանապարհով, բայց միաժամանակ անհրաժեշտ է բարձրացնել երկրի պաշտպանունակությունը:

«Նովոստի Գրուզիի»–ի փոխանցմամբ՝ Մարգվելաշվիլին շնորհակալություն է հայտնել վրացի զինվորականներին իրենց ուժերի ներդրման և անվտանգության ապահովման համար՝ հայտարարելով.

«Խաղաղ ճանապարհը հայտարարելով ցանկացած խնդրի լուծման անփոխարինելի ուղի՝ մենք պարտավոր ենք մշտապես մտածել երկրի պաշտպանունակության բարձրացման մասին: Մեր նպատակն է հասնել զինված ուժերի պատրաստվածության այնպիսի մակարդակի, որ մեր հակառակորդի մոտ վերանա պատերազմելու ցանկությունը: Խաղաղությունը մեր գլխավոր առաջնահերթությունն է, բայց եթե պետք լինի հայրենիքին, մեզնից յուրաքանչյուրը պատրաստ է զոհաբերել իրեն»։