Նոյեմբերի 26-ին ԱԺ պաշտպանության, ազգային անվտանգության եւ ներքին գործերի մշտական հանձնաժողովը Կորյուն Նահապետյանի նախագահությամբ քննարկեց եւ դրական եզրակացություն տվեց երկրորդ ընթերցման ներկայացված «Քաղաքացիական հատուկ ծառայության մասին» ՀՀ օրենքում փոփոխություններ եւ լրացումներ կատարելու մասին» օրինագծին:

Հանձնաժողովը քննարկեց նաեւ «Սահմանված կարգի խախտմամբ պարտադիր զինվորական ծառայություն չանցած քաղաքացիների մասին» ՀՀ օրենքում փոփոխություն կատարելու մասին» օրինագիծը, որը ներկայացրեց ՀՀ սփյուռքի նախարար Հրանուշ Հակոբյանը: Նա տեղեկացրեց, որ օրենքի խախտմամբ պարտադիր զինվորական ծառայության զորակոչից խուսափած ու 27 տարին լրացած Հայաստանի Հանրապետության քաղաքացիները, խուսափելով քրեական հետապնդումից, չեն վերադառնում հայրենիք: Այդ քաղաքացիների նկատմամբ հարուցված քրեական հետապնդումը դադարեցնելու նպատակով արդեն չորրորդ անգամ կատարվել է փոփոխություն, որը մեծ խթան է հանդիսացել հազարավոր երիտասարդների վերադարձը հայրենիք ապահովելու գործում:

Այս նախագիծը հնարավորություն կտա 27 տարին լրացած, պարտադիր զինվորական ծառայությունից խուսափած քաղաքացիներին սահմանված ժամկետում մուծել համապատասխան վճարը, վերադառնալ հայրենիք եւ ազատվել քրեական հետապնդումից:

Հանձնաժողովը դրական եզրակացություն տվեց օրինագծի վերաբերյալ՝ նստաշրջանի եւ քառօրյա նիստերի օրակարգերում ընդգրկվելու համար:

Քննարկվեցին նաեւ հանձնաժողովի առաջիկա աշխատանքային գործունեությանն առնչվող այլ հարցեր:

ԱԺ արտաքին հարաբերությունների մշտական հանձնաժողովը Արտակ Զաքարյանի նախագահությամբ քննարկեց 2013 թ-ի հունիսի 25-ին Երեւանում ստորագրված «Հայաստանի Հանրապետության եւ Ռուսաստանի Դաշնության միջեւ ռազմատեխնիկական համագործակցության զարգացման մասին» պայմանագիրը, որը ներկայացրեց ՀՀ պաշտպանության նախարարի տեղակալ Արա Նազարյանը: Պայմանագրի համաձայն՝ Հայաստանի Հանրապետության եւ Ռուսաստանի Դաշնության միջեւ ռազմական նշանակության արտադրանքի փոխադարձ մատակարարումները նախատեսվում է իրականացնել պարզեցված կարգով: Փոխնախարարը տեղեկացրեց, որ Ռուսաստանի Դաշնությունը նման պայմանագիր մինչ օրս կնքել է միայն Բելառուսի Հանրապետության հետ:

Քննարկված պայմանագիրը հանձնաժողովի դրական եզրակացությամբ կներկայացվի խորհրդարանի քննարկմանն ու վավերացմանը:

Նույն օրը Գագիկ Մինասյանի նախագահությամբ տեղի ունեցավ ԱԺ ֆինանսավարկային եւ բյուջետային հարցերի մշտական հանձնաժողովի նիստը:

Վերահսկիչ պալատի նախագահ Իշխան Զաքարյանը հանձնաժողովի գնահատմանը ներկայացրեց պալատի 2014 թ. գործունեության տարեկան ծրագիրը: ՎՊ-ն առանձնացրել է ուսումնասիրության 13 ուղղություն: Առաջին անգամ ՎՊ-ը ՀՀ պետական եկամուտների կոմիտեում ուսումնասիրելու է պետական բյուջեի մուտքերի ապահովման գործընթացը: Նաեւ նախատեսվում է վերահսկողություն իրականացնել Երեւանի քաղաքապետարանում՝ կապված ավտոճանապարհների, փողոցների եւ մայրուղիների կառուցման, վերակառուցման եւ հիմնանորոգման հետ: Ծրագրով նախատեսվում է ուսումնասիրություններ կատարել մի շարք նախարարություններում, ինչպես նաեւ ՀՀ Արմավիրի մարզպետարանում եւ Արմավիրի մարզի համայնքներում: ՎՊ նախագահը տեղեկացրեց, որ ծրագիրը մինչ լիագումար նիստում ԱԺ-ի հավանությանն արժանանալը առանձին կքննարկվի նաեւ խորհրդարանական բոլոր քաղաքական ուժերի հետ: Ծրագրի վերաբերյալ հնչեցին մի շարք առաջարկներ: Հանձնաժողովը դրական եզրակացություն տվեց ՎՊ ծրագրի վերաբերյալ՝ առաջիկա քառօրյա նիստերի օրակարգում ընդգրկվելու համար:

Նիստի ընթացքում ՀՀ ֆինանսների նախարար Դավիթ Սարգսյանը եւ ՀՀ ֆինանսների նախարարի տեղակալ-գլխավոր գանձապետ Ատոմ Ջանջուղազյանը ներկայացրին ՀՀ 2013 թվականի ինն ամիսների պետական բյուջեի կատարման ընթացքի վերաբերյալ տեղեկատվություն, ինչը ընդունվեց ի գիտություն:

Հանձնաժողովում որոշվեց նոյեմբերի 28-ին՝ ժամը 11.00-ին, ԱԺ 334 սրահում անցկացնել «Հաշվապահական հաշվառման մասին» եւ «Հանրային հատվածի կազմակերպությունների հաշվապահական հաշվառման մասին» ՀՀ օրենքների նախագծերի վերաբերյալ խորհրդարանական լսումներ: