«Հայաստանում մեկ անձն օրական օգտագործում է չորս հարյուր գրամ հաց, ինչն անթույլատրելի է, և խոսում է բնակչության աղքատության, անվճարունակության և ոչ ճիշտ սննդակարգի մասին»,–այսօրվա ասուլիսին ասել է Սպառողների միության նախագահ Արմեն Պողոսյանը։ Ըստ բանախոսի՝ հաշվարկված է, որ երեխան օրական 50-60, իսկ մեծահասակը՝ 100-200 գրամ հաց պետք է օգտագործի: Մարդկանց սննդաբաժնում ամենաշատը պետք է գերակշռեն միրգը, բանջարեղենը և կաթնամթերքը: Չնայած հացի շատ սպառումն ազգային առանձնահատկություն է, սակայն, փորձագետի կարծիքով, դա նաև վատ ապրուստից է գալիս։

«Մենք այսօր օգտագործում ենք այնքան հաց, որքան սովորաբար օգտագործում են պատերազմական վիճակում գտնվող երկրները»,–նշել է Պողոսյանը։

Ասուլիսի մեկ այլ բանախոս՝ «Քրամս» հաց արտադրող ընկերության նախագահ Անի Հարությունյանն էլ իր մտահոգությունը հայտնեց ներկրվող ցորենի որակի վերաբերյալ:

Ըստ նրա՝ հաճախ չի պահպանվում հացի տեղափոխման հիգիենան, և կարող ես հանդիպել, երբ հացը տեղադրված է մեքենաների նստատեղերին կամ ձվի տուփերի մեջ։

7or.am