Այսօրվա ասուլիսին «Ազգային անվտանգություն» կուսակցության նախագահ Գառնիկ Իսագուլյանն անդրադարձել է ՀՀ էներգետիկայի նախարար Արմեն Մովսիսյանի ելույթին՝ նրա վերլուծությունը համարելով տարօրինակ։

«Այն ժամանակ էներգետիկայի նախարար աշխատած և հիմա նույն պաշտոնը վարող մարդը քննադատում է իր նախորդ շրջանում կատարված գործողությունները։ «Գույք պարտքի դիմաց» միջկառավարական հանձնաժողովը կառավարում էր ներկայիս նախագահ Սերժ Սարգսյանը։ Հիմա Արմեն Մովսիսյանը քննադատում է այն ժամանակաշրջանը։ Ես իրեն առաջարկել էի «3+2» հայտնի ֆիլմից՝ «А теперь я Наташа»: Թող հիմա Արմեն Մովսիսյանը մի հատ թաշկինակ կապի, նստի սեղանի մյուս կողմում ու այն ժամանակվա Արմեն Մովսիսյանի փոխարեն պատասխանի ինքն իրեն»,–ասել է բանախոսը։ Իսագուլյանի համար տարօրինակ է նաև այն, որ Մովսիսյանն ամբողջ մեղավորությունը փորձում է բարդել Ռ. Քոչարյանի վրա։ Նա նշել է, որ եթե Արմեն Մովսիսյանն այն ժամանակ համամիտ չէր ստորագրվող փաստաթղթերի բովանդակության հետ, պետք է հրաժարական տար։

-Վերջապես պաշտոնյաները պետք է հասկանան, որ նախարարի աշխատանքը երբեմն դեմ գնալն է՝ ներկայացնելով սեփական տեսակետը, և եթե այն սեփական համոզմունքին չի համապատասխանում, բարի եղիր հրաժարական տալ։ Դրանով կյանքը չի ավարտվում։ Դրանով գոնե արժանապատվությունդ կպահես և որպես մարդ կմնաս։

7or.am