Ուկրաինայի Գերագույն ռադայի երեկվա նիստը, որի ընթացքում ընդունվել է նաև 2014թ. պետբյուջեն, մեծ քաղաքական սկանդալ է դարձել։ Ընդդիմությունը նորից արգելափակել է ամբիոնը, և Ռեգիոնների խմբակցության ու կոմունիստների մեծամասնությունը, առանց քննարկելու և էլեկտրոնային քվեարկության, ձեռքերի բարձրացմամբ ընդունել է մի շարք օրենքներ, որոնք, ըստ ընդդիմության և ԶԼՄ–ի, երկիրը վերածում են «ոստիկանական բռնատիրության»։ Այս մասին փոխանցում է newsru.com–ը՝ «УНИАН»–ին հղումով։

Ընդունված փաստաթղթերը մասնավորապես սահմանափակում են օգտատերերի հասանելիությունն ինտերնետային աղբյուրներին։ Բացի այդ, քրեական պատասխանատվություն է մտցվել զրպարտության և «ծայրահեղական գործունեության» համար։ Նոր օրենսդրական նախագիծը խստացնում է բողոքի ակցիաների անցկացման կարգը (արգելվում է նույնականացմանը խոչընդոտող դիմակների, շարֆերի, գլխարկների և այլ իրերի կրումը), զրպարտությունը կարգավորվում է Քրեական օրենսգրքով, իսկ համացանցի ու բջջային կապի օպերատորները ստիպված կլինեն պայմանագրեր կնքել հեռախոսաքարտեր վաճառելիս։ Համացանցի մատակարարները և պատասխանատուները ստիպված կլինեն հետևել «անօրինական տեղեկատվություն» տարածողներին, իսկ տեղեկատվական գործակալությունները չեն գործի առանց պետական գրանցման։ Այս ամենը կապի մատակարարները պետք է իրականացնեն սեփական միջոցների հաշվին։ Օրինագծի ընդունման վերաբերյալ մտահոգություն են հայտնել ԱՄՆ–ը և ԵԱՀԿ–ն՝ անվանելով այն ժողովրդավարական սկզբունքներին հակասող։