Սիրիայի նախագահ Բաշար Ասադը չի բացառել, որ կմասնակցի Սիրիայում առաջիկա նախագահական ընտրություններին, որոնք տեղի են ունենալու այս տարվա հունիսին։ Այս մասին, «ИТАР–ТАСС»–ի փոխանցմամբ, նա հայտարարել է «France Presse» գործակալությանը տված բացառիկ հարցազրույցի ժամանակ։

«Ես կարծում եմ՝ ոչինչ չի խանգարում իմ առաջադրվելուն, եթե դա ցանկանա հասարակությունը»,–ընդգծել է Ասադը։ Դամասկոսում ռուս խորհրդարանականի հետ զրույցում Ասադը հայտարարել է, որ պատրաստ է մրցակցության առաջիկա նախագահական ընտրություններին ընդդիմության ներկայացուցիչների հետ։

Ասադը հասկացրել է, որ չի պատրաստվում լքել քաղաքական դաշտը, և կասկածի տակ է առել ընդդիմադիր խմբավորումների ղեկավարների այն պնդումները, թե Սիրիայի տարածքի 70 տոկոսը նրանց վերահսկողության տակ է։

«Ընդդիմությունը հնարավորություն ունի՝ ցուցադրելու՝ ինչպիսի ազդեցություն ունի Սիրիայում»,–ասել է Ասադը։ Բացի այդ, նա հիշեցրել է ԱՄՆ պետքարտուղար Ջոն Քերիի այն համոզմունքը, որ Սիրիայի ներկայիս վարչակարգին աջակցում է բնակչության առնվազն 50 տոկոսը։