ՀՀ ԱԺ ԲՀԿ խմբակցության պատգամավոր, ԱԺ տնտեսական հարցերի մշտական հանձնաժողովի փոխնախագահ Միքայել Մելքումյանի համոզմամբ՝ պարտադիր կուտակային կենսաթոշակային համակարգի և գազի պայմանագրի դեմ պայքարի բացակայությունը շատ անբնական կլիներ։

Այսօր հրավիրված ասուլիսում պատգամավորը նշել է, որ Հայաստանում մարդկանց մոտ հիասթափությունը վերացնելու համար քաղաքական լայն կոնսոլիդացիա է անհրաժեշտ:

–Մեկ քաղաքական ուժը չի կարողանալու այս վիճակից դուրս գալ: Լայն կոնսոլիդացիայի հարցը՝ ծանրակշիռ կեցվածքով, ճիշտ գնահատելով պահը, պետք է հասցնենք մի կետի, որ այդ համախմբումը տեղի ունենա: Մենք պետք է քայլ-քայլ անցնենք այդ ճանապարհը,–ասել է ԲՀԿ–ական պատգամավորը։

Ինչ վերաբերում է 2010թ. կուտակային կենսաթոշակային համակարգի մասին օրենքին ԲՀԿ–ի՝ կողմ քվեարկելուն, Մ. Մելքումյանն ընդգծել է, որ այդ հարցը բարձրացվել է ամենաբարձր քաղաքական մակարդակով, ԲՀԿ-ի ղեկավարը և իրենց խմբակցության պատգամավորներից 2–ը մտահոգություն են հայտնել այդ հարցի հետ կապված:

–Ենթադրվում էր, որ 2014 թվականին հաղթահարված կլինեին ճգնաժամային արգելքները, և մինչ պարտադիրի գործողության մեջ մտնելը ցուցանիշները կլինեին բարվոք։ Բայց տեսանք, որ ցուցանիշները բարվոք չեն: Չի կարելի նման աղքատության պայմաններում այդպիսի բարեփոխումներ անել: 2014 թվականի սոցիալ–տնտեսական ցուցանիշները մեզ չեն բավարարում, և պետք է «պաուզա» տալ այս բաղադրիչ մասով,-ասել է Մ.Մելքումյանը։

7or.am