Այսօրվա ասուլիսին թուրքագետ Հակոբ Չաքրյանը, խոսելով Հասան Օքթայի՝ Հայաստան այցից ու համապատասխան լուսանկարներից, ասել է, որ Օքթային ճանաչում է մոտ 5-6 տարի։ Նա Չաքրյանին հանդիպման նպատակով զանգահարել է հունվարի 20-ին։ Հանդիպման ժամանակ էլ Հասան Օքթայը խոսել է Հայաստանում «Անադոլու» գործակալության գրասենյակ բացելու մասին։ Թուրքագետը հարցի վերաբերյալ զանգահարել է ՀՀ ԱԳՆ, որտեղ և նրան ասել էին, որ տեղյակ են։ ԱԳՆ–ից ասել են, որ այստեղ գրասենյակ բացելու պայմանն է հայկական կողմի համապատասխան գործակալության բացումն Անկարայում, և որ մեր այնտեղի թղթակիցը կարողանա օգտվել նույն լիազորություններից, որոնցից օգտվում է իրենց թղթակիցը։ Չաքրյանը նաև հավելել է. «Թուրքական կողմի թղթակիցը պետք է լինի բուն հայաստանցի և ոչ թե սփյուռքահայ»։

Թուրքերի՝ հայերենին չտիրապետելու պատճառով թե՛ Հայաստանում Թուրքիայի թղթակիցը, թե՛ Թուրքիայում Հայաստանինը հայ պետք է լինի։

Անդրադառնալով Օքթայի՝ գաղտնի գործակալ լինելու վարկածին, Չաքրյանն ասել է, որ չի կարող բացահայտ ասել, թե Օքթայը գործակալ է, բայց պետք է համագործակցի եթե ոչ գաղտնի ծառայության, ապա արտգործնախարարության հետ.

«Որքան ինձ հայտնի է, նա շուտ–շուտ է գնում–գալիս Հայաստան, Գյումրի էլ է գնում»։

«Գորշ գայլերի» նշանը ցույց տալն էլ Չաքրյանն անվանել է «կապիկություն ու լկտիություն» Հասանի կողմից։

Թուրքագետը կիսվել է նաև լրագրողների հետ մասնագիտական գիտելիքներով. «Ստամբուլում «Գորշ գայլերի» անդամները, սիմվոլիկ նշան անելուց բացի, գիշերները երեքի կողմերը ոռնում են։ Այդ ոռնոցներից թուրքերը չէին կարողանում քնել և մշտապես դիմում էին ոստիկանություն։ Դա ակտիվության շրջանն էր, բայց էրդողանի իշխանության օրոք այդ աստիճանի ակտիվ չեն»։

Ըստ բանախոսի՝ Օքթայն, առանց իմանալու, լավություն է արել. «Նա իր դեմքն է ցույց տվել։ Ազերի եղբայրներին էլ ցույց է տվել, որ գնում, հայերի հետ է եղբայրանում, նաև ինձ հետ, վեհափառի և վարչապետի, բացի այդ, վնաս է պատճառել գործակալությանը»։

7or.am