Լոռու մարզի Գարգառ գյուղի գյուղատնտես, «Հասառ» ՍՊԸ–ի տնօրեն Սամվել Հարությունյանը պնդում է, որ «ՀայՌուսգազարդի», ներկայում՝ «Գազպրոմ Արմենիա»–ի պատճառով 100 միլիոն դրամի վնաս է կրել։ Այսօր հրավիրված ասուլիսում նա հայտնել է, որ այդ ընկերությունը կանխամտածված անջատել է իր ֆերմերային տնտեսության գազը։

–Շանտաժով, իրենց դիրքը չարաշահելով փորձեցին ինձ փակուղու մեջ դնել ու գումարներ յուրացնել։ 10 հազար դոլար կանխավճար ուզեցին՝ սպառնալով, որ եթե չտամ, գազը կկտրեն։ 1975-ից Գարգառում զբաղվում եմ ֆերմերային տնտեսությամբ: Բայց 21-րդ դարի «Չարի վերջ» խաղացողները շանտաժով փորձեցին ինձ փակուղու մեջ դնել,–ասել է ֆերմերը:

Նա նաև պատմել է, որ 2006թ. «ՀայՌուսգազարդի» հետ պայմանագիր է կնքել, որ տարեկան կարող է օգտագործել անսահմանափակ քանակությամբ գազ, սակայն հետո ընկերությունը որոշել է խզել պայմանագիրը։ Գյուղատնտեսը դիմել է դատարան, և այժմ մոտ 7 տարի չջեռուցվող ջերմոցը կանգնած է կործանման եզրին:

–Սա սպիտակ ցեղասպանություն է։ Ինձ սնանկացրել են,-հայտարարել է նա։

Ասուլիսին ներկա հասարակական-քաղաքական գործիչ Գուրգեն Եղիազարյանն էլ տեղի ունեցածի համար մեղադրում է ՀՀ վարչապետ Տիգրան Սարգսյանին։

–Մարդամեկը, որին ասում են վարչապետ, հայտարարեց՝ թողնենք՝ մնաք երկրում, որ հեղափոխությո՞ւն անեք: ՀՀ քաղաքացին մինչև կոկորդը հոգնել է ապահով Հայաստանից: Պետությունը նրա համար չէ, որ մարդու հետևից տանկերով ընկնի ու ջնջի: Ուզում են խեղդել, ձեռքից խլել,–ասել է Գ. Եղիազարյանը։

7or.am