Այսօր Հայաստանի պետական ճարտարագիտական համալսարանի մոտ՝ մեծ դասամիջոցի ժամին, «Դ!եմ եմ» նախաձեռնության անդամները հանդիպել են ուսանողների և պրոֆեսորադասախոսական կազմի հետ:

Նպատակը՝ պարտադիր կուտակային կենսաթոշակային համակարգի խնդիրների մասին իրազեկելն էր։

Հանդիպումը հարթ չի անցել. ՀՊՃՀ–ի ռեկտոր Արա Ավետիսյանը փորձել է խոչընդոտել խաղաղ հավաք իրակացնողներին, անգամ թույլ չի տվել ծածանել «Դ!եմ»-ի դրոշը: Ռեկտորն ասել է, որ ինքը կողմ է նոր համակարգին, հրահանգել ուսանողներին՝ գնալ լսարան։ Ուսանողները, սակայն, նրան հակադարձել են՝ ընդգծելով, որ իրենք թեև այժմ չեն աշխատում, բայց դեմ են պարտադիր կուտակայինին։ Ուսանողները ծափահարել են «Դ!եմ»-ի անդամներին և բացականչել՝ «դեմ եմ»։

Հանդիպման կազմակերպիչներն էլ հիշեցրել են ԵԿՄ համագումարում Սերժ Սարգսյանի խոսքերը, որ ժողովրդի 80%–ը դեմ է այս համակարգին, և հավելել, որ մտադիր են նմանօրինակ հանդիպումներ կազմակերպել այլ բուհերում ևս։

7or.am