ՀՀ–ում ԱՄՆ դեսպան Ջոն Հեֆերնը Կենսաթոշակային երրորդ միջազգային համաժողովի համար նախատեսված իր ելույթում ընդգծել է՝ 13 տարի է, որ ԱՄՆ-ն աշխատում է տեղական գործընկերների հետ Հայաստանի սոցիալական պաշտպանության համակարգը բարեփոխելու համար՝ հատուկ ուշադրություն դարձնելով կենսաթոշակներին:

«Ցանկացած երկրի առջև ծառացած առավել դժվարին բարեփոխումներից մեկը կենսաթոշակային բարեփոխումն է: Սա է պատճառը, որ Հայաստանը ներգրավել է միջազգային փորձագետների և ծախսել է ավելի քան 10 տարի՝ մանրակրկիտ կերպով ընտրելով և ձևավորելով նոր կենսաթոշակային համակարգ, որը հարմարեցված է Հայաստանի ժողովրդագրական և տնտեսական կարիքներին»,–նշում է դեսպանը:

Նա ընդունում է, որ կենսաթոշակային բարեփոխումները վիճահարույց են. դրանք ներառում են երկարաժամկետ պլանավորում կառավարությունների, գործատուների և աշխատողների կողմից, որոնք արդեն իսկ գտնվում են բազմաթիվ կարճաժամկետ ճնշումների տակ:

«Մենք բոլորս գիտենք, որ բարեփոխումների իրականացումը կդառնա հաջողության իսկական փորձություն։ Մենք ողջունում ենք Հայաստանի կառավարության ջանքերն այս նոր համակարգի հիմքերը ձևավորելու համար,–նշում է Հեֆերնը,–հավատացած ենք, որ նոր կենսաթոշակային համակարգը շրջահայաց ձևով մշակված է՝ պաշտպանելու ապագա կենսաթոշակառուների շահերը: Այն Հայաստանի աշխատողներին հնարավորություն կտա բարելավել իրենց ֆինանսական ապահովվածությունը կենսաթոշակային տարիքում՝ եկամուտների աղբյուրները դիվերսիֆիկացնելու, այդ թվում՝ մասնավոր, կրկնում եմ՝ մասնավոր կենսաթոշակային հիմնադրամում խնայողությունների կատարելու միջոցով»:

Կենսաթոշակային բարեփոխման հետ կապված մտահոգությունները նա բնական է համարում՝ հաշվի առնելով նաև Խորհրդային Միության ավանդների ճակատագիրը:

«Հիշողությունները դեռ թարմ են: Դեռ ավելին՝ գոյություն ունի վստահության պակաս կառավարության, հայաստանյան հաստատությունների և քաղաքացիների միջև: Կառավարությունը պետք է աշխատի այս բացը լրացնելու ուղղությամբ՝ լրջորեն ներգրավելով քաղաքացիներին, շտկելով բոլոր թյուրըմբռնումներն ու լսելով և արձագանքելով վերջիններիս մտահոգություններին։ Կենսաթոշակային այս բարեփոխումը կառավարության, միջազգային դոնորների և փորձագետների տասը տարվա սերտ համագործակցության արդյունք է»,–հավելում է Հեֆերնը՝ նշելով, որ Հայաստանում գործող ներկայիս համակարգը երկար գոյատևել չի կարող, և փոփոխությունը, թեկուզ՝ բարդ, սակայն անհրաժեշտ է:

Դեսպանը նաև իրենց շարունակական աջակցությունն է հայտնել այս բարեփոխման հաջող իրականացմանը՝ հույս ունենալով, որ ՀՀ կառավարությունը, գործատուներն ու աշխատողները կիրականացնեն այս բարեփոխումներն ի շահ բոլորի:

Հիշեցնենք, որ Կենսաթոշակային երրորդ միջազգային համաժողովը, որին մասնակցում էր նաև ԱՄՆ դեսպանը, «Դ!եմ եմ» նախաձեռնության անդամների ջանքերի շնորհիվ տապալվեց։

7or.am