–«Չատլախ» բառը տաճկերեն է, որը նշանակում է ճաք տված,–խորհրդարանում լրագրողներին ասել է ՀՅԴ խմբակցության ղեկավար Արմեն Ռուստամյանը՝ պարզաբանելով, թե ինչու ՀՀ արդարադատության նախարարին անվանեց «չատլախ»։

–Կարող եք բացել Ստեփան Մալխասյանցի բացատրական բառարանը ու այնտեղ հայտնաբերել այս բառի բացատրությունը: Ինքը մեզ հորդորում է՝ լավ իմաստներ գտնենք, մենք էլ իրեն ենք հորդորում լավ իմաստներ գտնել:Եթե իրեն թվում է՝ մենք չենք տիրապետում բառապաշարին, ապա չարաչար սխալվում է,–հավելել է Ա. Ռուստամյանը՝ նշելով, որ այսքանով իրենք կսահմանափակվեն.

–Սա իմ ոճը չէ, բայց հարցը նա է, որ նախարարը իր բարձունքին պետք է մնա: Խոսքը 53 պատգամավորի մասին է, ու դու պարզապես պարտավոր ես հարգել նրանց կարծիքը։ Ո՞նց կարելի է քամահրանքով արտահայտվել: Մարդուն ասես, կվիրավորվի, բա 53 պատգամավորի մասին է խոսքը, ու անպատվում ես նրանց հետ եղած ժողովրդին: Սրանով պետք է վերջ դրվի այս ամենին։ Թե չէ՝ խոտորնակին խոտորնակ սկզբունքն է:

ՀՀԿ–ական նախարարի և ՀՅԴ խմբակցության ղեկավարի խոսքերը մեկնաբանել է նաև խմբակցության ղեկավար Գալուստ Սահակյանը։

–Ցանկացած մարդ իրավունք ունի վրդովվելու, բայց «ղալաթ» բառը վիրավորանք չէ։ Խորհուրդ կտայի և՛ լրագրողներին, և՛ հասարակությանը Թումանյանի «Մի կաթիլ մեղրը» կարդալ, և այդ ճանապարհով չգնալ։ Բայց եթե մի կողմը վիրավորում է, ապա դա վիրավորանք է։ Ես նման բառեր չեմ կիրառում. իմ լեքսիկոնում նման բառ չկա,–նշել է ՀՀԿ խմբակցության ղեկավարը։

7or.am