Այսօր «Նաիրիտ» գործարանի աշխատակիցները հավաքվել էին ՀՀ Ազգային ժողովի մոտ՝ իրենց բողոքը հայտնելու ավելի քան մեկ տարի չվճարված աշխատավարձերի համար: Սոցիալական ծանր վիճակում հայտնված նաիրիտցիների խոսքերով՝ իրենք աշխատավարձ չեն ստացել 2012 թվականի դեկտեմբերից, իսկ 2010–ից սկսած՝ գործարանում խնդիրներն արդեն իսկ առկա էին:

«7օր»-ի հարցին՝ ինչպես են հոգում իրենց սոցիալական ծախսերը, աշխատակիցները պատասխանել են.

–Անձամբ ինձ աղջիկս է գումար ուղարկում...

–Խանութից պարտքով ենք վերցնում, հետո մի երկու ամիս հետո փողը տալիս ենք։

–Մարդիկ բժշկի են դիմում, հիվանդ են: Ստիպված ազատման դիմում եմ տալիս, որ գումար ստանամ բուժվելու համար, «ռասչյոտնին» էլ չեն տալիս:

–Երեխուն համալսարանից դուրս են թողնում վարձը չվճարելու պատճառով։

Լրագրողի հարցին՝ «Նաիրիտի» տնօրինությունն ինչով է պատճառաբանում աշխատավարձերը չվճարելը, աշխատակիցը պատասխանել է. «Ասում են՝ փող չկա»:

Գործարանում ստեղծված իրավիճակի մեղավորների (Տիգրան Սարգսյանի ու նրա եղբոր) մասին մամուլում հայտնված լուրերին աշխատակիցներից մեկն արձագանքել է. «Ախպերը «զամդիրեկտոր» է եղել: Վերջերս էլ ազատվավ, մաքուր փողերը ստացավ, գնաց: 42 միլիոն ստացավ, գնաց: Հիմա ես շատ-շատ, քարը տրաքի, պետք է մեկ միլիոն փող ստանամ, էդի գնաց, մեկ տարի հետո ստանամ, թե չստանամ, բայց էդ փողն ինձ պետք է, չէ՞»:

Նաիրիտցիների խոսքերով՝ գործարանում ներդրումներ են եղել, սակայն դրանցից որևէ արդյունք չեն տեսել: Ստեղծված իրավիճակն էլ գնահատել են որպես արտագաղթը խրախուսող. «Մարդիկ ստիպված Ռուսաստան են գնում»:

Ցուցարարները վստահեցրել են, որ շարունակելու են պայքարն իրենց իրավունքների համար։

7or.am