Այսօր տարբեր մամուլի ակումբներում միաժամանակ մամուլի ասուլիս էին տալիս «Ժառանգություն» խմբակցության պատգամավորներ Ստեփան Սաֆարյանը և Վարդան Խաչատրյանը։ Հետաքրքրական է, որ լինելով նույն կուսակցության անդամներ՝ նրանք հայ-թուրքական սահմանի բացման մասին երկու տարբեր կարծիքներ են հայտնել։ Վարդան Խաչատրյանը, օրինակ, խորապես համոզված է, որ սահմանը բաց չի լինի:

-Իմ կանխատեսումը պայամանավորված է նրանով, որ ադրբեջանական ճնշումը Թուրքիայի համար հաղթահարելի չէ։ Այն, ինչի համար Թուրքիային գնահատում են որպես թանկարժեք դաշնակից, որպես բանալի, գտնվում է Ադրբեջանի ձեռքում։ Դա Թուրքիայի հնարավոր ազդեցությունն է թուրքալեզու ժողովուրդների և պետությունների վրա, որոնք բնակեցնում են Կասպյան ավազանը, և որոնց հետ կապը պայմանավորված է Ադրբեջանով,- ասել է Վ. Խաչատրյանը՝ հավելելով, որ հնարավոր է Թուրքիայից և Հայաստանից մեկական հյուպատոսներ լինեն Թբիլիսիում, և նախնական դիվանագիտական հարաբերություններ հաստատվեն, բայց սահմանը, ըստ պատգամավորի, միանշանակ չի բացվի։

«7օր»-ի  այն հարցին, թե կգնա՞ արդյոք ՀՀ նախագահ Սերժ Սարգսյանը ֆուտբոլ դիտելու, Վ. Խաչատրյանը պատասխանել է, թե չի կարող կանխատեսում անել.

-Ինձ թվում է, որ ճիշտ կլինի չգնալը և գործընթացը կասեցնելը։

Փոխարենը, «Ժառանգություն» խմբակցության պատգամավոր Ստեփան Սաֆարյանը կարծում է, որ ՀՀ նախագահ Սերժ Սարգսյանը կգնա Հայաստան-Թուրքիա ֆուտբոլային հանդիպումը դիտելու, քանի որ Թուրքիայի վրա ԱՄՆ-ի կողմից ճնշում է գործադրվում։

-Կոնգրեսում առաջ է քաշվել Հայոց ցեղասպանության ճանաչման բանաձևը։ Սա նշանակում է, որ Թուրքիան հայտնվելու է լուրջ ճնշումների տակ՝ կա՛մ բացել սահմանը և գնալ քայլ առաջ հայ-թուրքական հարաբերությունների նորմալացման ուղղությամբ, կա՛մ ԱՄՆ-ի կոնգրեսը կճանաչի Հայոց ցեղասպանությունը։ Այս կտրվածքով  ես կարծում եմ, որ Թուրքիան կընտրի սահմանը բացելո՛ւ ճանապարհը։

Հեղինե Հարությունյան

Արեգնազ Մանուկյան