Այսօր ՀՀ ԱԺ նիստում ՀԱԿ խմբակցության ղեկավար Լևոն Զուրաբյանը, անդրադառնալով մարտի մեկի հարցով ժամանակավոր հանձնաժողով ստեղծելու հարցին, իր ելույթում նշել է, որ ժամանակակից աշխարհում ցանկացած իշխանություն կորցնում է լեգիտիմությունն այն պահից, երբ կրակում է ժողովրդի վրա: ՀԱԿ խմբակցության ղեկավարն ասել է, որ ԵԽԽՎ-ում նախաձեռնել է մի գործընթաց, որի հետևանքով ԵԽԽՎ-ն կուսումնասիրի մահաբեր զենքի գործածումն իշխանության կողմից ժողովրդի դեմ որպես մեծագույն չարիք՝ հաշվի առնելով մարտի 1-ին Հայաստանում կատարված դեպքերը և նմանատիպ դեպքերն Ուկրաինայում։ Լևոն Զուրաբյանը պարզաբանել է. «Սա առաջին հերթին արդարատության խոչընդոտման վերացման հանձնաժողով է: Այսօր այս դահլիճում որոշվելու է, թե ով է քաղաքականապես պատասխանատու արդարադատության խոչընդոտման համար: 4 խմբակցությունները դրել են բացահայտման հարցը, իսկ իշխող կոալիցիան փորձում է տապալել՝ դառնալով արդարադատության խոչընդոտման գլխավոր դերակատար»։

Պատգամավորը համոզմունք է հայտնել, որ մարտի 1-ի հարցով պահանջատեր է յուրաքանչյուր գիտակից ՀՀ քաղաքացի։ Նա հավելել է, որ իշխանությունը ստանում է ինքնամաքրվելու հնարավորություն. «Ունեք շանս՝ լինելով իշխանության մեջ՝ քայլ կատարել ինքնամաքրվելու նպատակով: Դուք այն իշխանությունը չեք, որ ձեր մեջ բարոյական ուժ ու արիություն գտնեք նման քայլ կատարելու համար, այսօր այդ քայլը չեք կատարի, բայց հետո կզղջաք: Արդարությունը կհաստատվի այն իշխանության օրոք, որը կհաստատվի ձեզանից հետո: Անցած վեց տարին առանց այդ էլ մեծ ժամանակ էր մեղավորներին գտնելու և պատասխանատվության կանչելու համար, և վստահ եմ, որ շատ շուտով պատասխան եք տալու»։

Հավելենք, որ Լևոն Զուրաբյանը դիմել է ԵԽԽՎ՝ նախաձեռնելով «Երևանում ու Կիևում ցուցարարների վրա հարձակման օրինականությունը» ստուգելու գործընթացը: