ՍԴ երկու անդամների լիազորություններն առաջիկայում կդադարեցվեն

● Լրահոս

05.03.2014 ● 12:25

ՍԴ երկու անդամների լիազորություններն առաջիկայում կդադարեցվեն

«Փաստինֆո»-ի փոխանցմամբ՝ այսօր Սահմանադրական դատարանի անդամ Մանուկ Թոփուզյանը դառնում է 65 տարեկան:

Մ.Թոփուզյանը ՍԴ անդամ է նշանակվել ՀՀ նախագահի՝ 2009թ. հուլիսի 8-ի հրամանագրով, այսինքն՝ 2005թ. սահմանադրական փոփոխություններից հետո, ինչը նշանակում է, որ նրա վրա տարածվում է սահմանադրական նորմը, ըստ որի՝ ՍԴ անդամը պաշտոնավարում են մինչև 65 տարին լրանալը:

Միևնույն ժամանակ՝ «Սահմանադրական դատարանի մասին» ՀՀ օրենքի 14-րդ հոդվածով սահմանված է, որ եթե սահմանադրական դատարանի անդամն իր պաշտոնավարման տարիքը լրանալու պահին մասնակցում է մեկ կամ մեկից ավելի գործերի դատաքննությանը, ապա նրա լիազորությունները դադարում են այդ գործի (գործերի) ավարտման օրը, բայց ոչ ուշ, քան պաշտոնավարման տարիքը լրանալու օրվանից վեց ամիս հետո:

Նշենք, որ այս պահին ՍԴ-ի վարույթում է ՀՀ վարչական վերաքննիչ դատարանի դիմումի հիման վրա` Հայաստանի Հանրապետության մաքսային օրենսգրքի 224-րդ հոդվածի`ՀՀ Սահմանադրությանը համապատասխանության հարցը որոշելու վերաբերյալ գործը, որով զեկուցող է նշանակված Մ.Թոփուզյանը:

Այս գործի դատաքննությունը նախապես նշանակված էր մարտի 4-ին, սակայն ՍԴ-ի՝ փետրվարի 25-ի աշխատակարգային որոշմամբ՝ գործի դատաքննության օրը փոխադրվել է հունիսի 3-ին՝ ՍԴ ծանրաբեռնվածության պատճառաբանությամբ:

Պաշտոնավարման տարիքը լրանալու հիմքով առաջիկայում կդադարեցվեն նաև ՍԴ անդամ Վալերի Պողոսյանի լիազորությունները: Քսան օրից՝ մարտի 25-ին, նա կդառնա 70 տարեկան:

Վ.Պողոսյանը ՍԴ անդամ է 1996 թվականից՝ ՍԴ կազմավորման օրվանից: Այդ իսկ պատճառով նրա վրա տարածվում է 2005թ. սահմանադրական փոփոխությունների դրույթը, ըստ որի՝ ՍԴ գործող անդամները շարունակում են պաշտոնավարել մինչև իրենց 70 տարին լրանալը:

pastinfo.am