ՌԴ նախագահ Վլադիմիր Պուտինն ու ԱՄՆ նախագահ Բարաք Օբաման հեռախոսազրույց են ունեցել ու քննարկել են Ուկրաինայում տիրող իրավիճակը։ «Взгляд»–ի փոխանցմամբ՝ կողմերն ընդգծել են, որ ռուս-ամերիկյան հարաբերությունները չպետք է տուժեն արտաքին լոկալ խնդիրների պատճառով։

Կրեմլի մամուլի ծառայությունից հայտնում են, որ Պուտինն ընդգծել է, որ Ռուսաստանը չի կարող անտեսել իրենից ակնկալվող օգնությունը, և գործում է միջազգային օրենքներին համահունչ։

Նա նաև համոզմունք է հայտնել, որ Ուկրաինայի ժամանակավոր կառավարությունը երկրի արևելյան, հարավարևելյան շրջաններին ու Ղրիմին ապօրինի որոշումներ է պարտադրում։

Իր հերթին, Օբաման անհրաժեշտ է համարել Ուկրաինայում ստեղծված իրավիճակը հարթելու նպատակով ուղիղ բանակցություններ անցկացնել Մոսկվայի ու Կիևի միջև և դիտորդներ ուղարկել այնտեղ։

Օբաման վստահ է, որ ստեղծված իրավիճակը դիվանագիտական լուծման ճանապարհ ունի, որը բխում է և՛ Ռուսաստանի, և՛ Ուկրաինայի, և՛ միջազգային հանրության շահերից։

7or.am