Այսօրվա ասուլիսիսին Առողջապահության նախարարության իմունականխարգելման ազգային ծրագրի ղեկավար Գայանե Սահակյանը հայտարարել է, որ այս տարվա սեպտեմբերից նոր տեսակի պնևմակոկային պատվաստանյութ կներկրվի հուլիսի 15-ից հետո ծնված երեխաներին պատվաստելու նպատակով։ Պատվաստումն ուղղված է նվազեցնելու թոքաբորբերի ու մինինգիտների քանակը (գլխուղեղի թաղանթի բորբոքվածություն): Բանախոսը նշեց, որ պատվաստանյութը կներկրվի Բելգիայից և Ֆրանսիայից քառասուն հազար չափաքանակով։

«Այս պատվաստման արդյունքը մենք կնկատենք մի քանի տարի անց, երբ կնվազեն մինինգիտներն ու թոքաբորբերը, հետևաբար, կպակասեն նաև մանկամահացությունները: Սրանք շատ կարևոր պատվաստումներ են մեր հասարակության ավելի առողջ ապրելակերպի համար»,–ասել է մասնագետը։

Սահակյանը խոսել է նաև պատվաստումից հրաժարվելու դեպքում ռիսկերի մասին. «Իհարկե, որևէ մեկին մենք չենք պարտադրում, բայց հետևողականորեն մեր բժիշկները մի քանի անգամ զանգում են ծնողին, բացատրում են երեխային պատվաստելու նշանակությունը: Օրինակ՝ ծնողներից մեկը հրաժարվել էր պենտավալետ պատվաստումից, իսկ հիմա երեխան մինինգիտ ունի, և հետևաբար, մտավոր հետամնացության խնդիր է առաջացել: Նա այսօր մեղադրում է բժիշկներին, որ իրեն լավ չեն բացատրել պատվաստման կարևորությունը, չեն ստիպել, որ բերի երեխային պատվաստման: Ցանկացած պարագայում միշտ մեղադրում են բժշկին»։

Իր խոսքում առողջապահության ներկայացուցիչը նշել է նաև, որ պատվաստումները մի շարք հիվանդությունների կասեցմանն են նպաստել հասարակության շրջանում. «Սա չի նշանակում, որ եթե մենք սկսենք չպատվաստվել, այդ հիվանդությունները նորից ի հայտ չեն գա: Ցանկացած մարդու թվում է, թե իրեն հարուցիչը կշրջանցի: Բայց տեսեք, թե Վրաստանում ինչպես բռնկվեց կարմրուկի համաճարակ, Մոսկվայում էլ է սկսվում, բայց մեզ մոտ՝ ոչ, որովհետև մենք կանխարգելել ենք»։