Եվրոպական միության կողմից ֆինանսավորվող «Կոռուպցիայի դեմ պայքարի բազմակողմանի խթանում» ծրագրի պաշտոնական բացման արարողությունը տեղի ունեցավ 2014 թվականի մարտի 25-ին Երևանի «Բեստ Վեստեռն Կոնգրես» հյուրանոցի «Պիկասո» սրահում:

«Նպատակ է դրված, որ փաստաթուղթը չպետք է լինի շատ մեծ, ծավալուն, այսպես ասած`100 էջանոց, որպեսզի հետո չիմանանք` իրականացվեց, չիրականացվեց, որ մասն իրականացվեց: Նպատակն է կոնկրետ հակակոռուպցիոն գործողություններ նախատեսել փաստաթղթով»,-ասաց ՀՀ Արդարադատության նախարարի տեղակալ Արամ Օրբելյանը նոր մշակվելիք հակակոռուպցիոն ռազմավարության մասին:

«Եվրոմիությունն ամրապնդել է իր աջակցությունը քաղաքացիական հասարակությանը ՀՀ-ում, և մենք ճանաչում ենք քաղհասարակության կարևոր դերը ինչպես Կառավարության երկխոսության գործընթացում ընդգրկվելու, այնպես էլ Կառավարությունից հաշվետվություն պահանջելու իր գործողությունների համար»,-նշեց Հայաստանում Եվրոպական միության պատվիրակության ղեկավարը Տրայան Հրիսթեան:

«Կոռուպցիայի դեմ պայքարը ոչ միայն երկրի իշխանությունների խնդիրն է այլ առաջին հերթին քաղաքացիական հասարակության խնդիրն է, որովհետև եթե քաղաքացիական հասարակությունը չբարձրաձայնի, պահանջատեր չդառնա և օրակարգային չդարձնի այդ խնդիրն իշխանությունների համար, մենք դժվար թե կարողանանք մեծ քայլերով առաջ գնալ և հաղթահարել այս երևույթը»,-կարծում է Հայաստանի երիտասարդ իրավաբանների ասոցիացիայի նախագահ, «Կոռուպցիայի դեմ պայքարի բազմակողմանի խթանում» ծրագրի ղեկավար Կարեն Զադոյանը:

Ծրագրի հիմնական նպատակն է մեծացնել քաղաքացիական հասարակության կազմակերպությունների (ՔՀԿ) դերը հակակոռուպցիոն բարեփոխումների խթանման և իրականացման գործում: Ծրագրի շրջանակներում կհզորացվեն ՔՀԿ-ների և ԶԼՄ-ների մոնիթորինգի և վերահսկողության կարողությունները, հանրային վերահսկողության արդյունավետության բարձրացման նպատակով նրանց կտրամադրվեն փոքրիկ դրամաշնորհներ, ինչպես նաև հակակոռուպցիոն ինստիտուցիոնալ մեխանիզմները ամրապնդելու համար ՔՀԿ-ների մասնակցությամբ կստեղծվի ՔՀԿ-կառավարություն կայուն երկխոսություն:

Միջոցառման շրջանակներում ծրագրի ղեկավար Կարեն Զադոյանը ներկայացրեց ծրագիրը: Միջոցառմանը մասնակցեցին ներկայացուցիչներ միջազգային և պետական մարմիններից, քաղաքացիական հասարակության կազմակերպություններից, ԶԼՄ-ներից:

Ծրագիրն իրականացվում է Եվրոպական միության ֆինանսավորմամբ՝ «Հայաստանի երիտասարդ իրավաբանների ասոցիացիա» ՀԿ-ի կողմից (իրականացնող)՝ «Ինֆորմացիայի ազատության կենտրոն» ՀԿ-ի հետ համագործակցությամբ (գործընկեր): Ծրագրի տևողությունը 3 տարի է (2014 թվականի հունվարից 2016 թվականի դեկտեմբեր): Ծրագրի բյուջեն կազմում է 650.000 եվրո: