Այսօրվա խորհրդարանական նիստում ՀԱԿ խմբակցության քարտուղար Արամ Մանուկյանը հայոց լեզվի հերթական դասերն է տվել պատգամավորներին։ «Կրթության մասին» օրենքում փոփոխություններ կատարելու նախագծի քննարկմանը նա օրենսդիրներին կոչ է արել հայերեն ճի՛շտ խոսել:

–Ձեր բառապաշարում հաճախ հայերեն ոչ ճիշտ բառեր եք գործածում: Օրինակ՝ «գտնում եմ» արտահայտություն հայերենում չկա, պետք է ասել՝ կարծում եմ: «Ըստ ինձ», «նամանավանդ» բառերի փոխարեն պետք է օգտագործել «ըստ իս», «մանավանդ»։ «Ամենալավագույն» բառը բացարձակապես սխալ է. «լավագույնը» լիովին արտահայտում է այդ միտքը։ «Հույսով եմ» արտահայտություն չկա, կա «հուսով եմ»,–ասել է Ա. Մանուկյանը:

Նա դիտողություն է արել նաև ԱԺ նախագահ Հովիկ Աբրահամյանին՝ ընդգծելով, որ «գրանցվել են 108 պատգամավորներ»–ի փոխարեն պետք է ասել՝ «գրանցվել է 108 պատգամավոր»:

Հայոց լեզվի դասերը թերևս ապարդյուն չեն անցել, քանզի երբ Արամ Մանուկյանն իր խոսքում ասել է՝ 7000 աշակերտներ, Հովիկ Աբրահամյանը միանգամից արձագանքել է.

–7000 աշակերտներ չէ, 7000 աշակերտ, ճի՛շտ խոսեք։

7or.am