ՍԴ այսօրվա նիստում ՀՀ ԱԺ սոցիալական հարցերի մշտական հանձնաժողովի նախագահ, ՀՀԿ–ական Հակոբ Հակոբյանը շնորհակալություն է հայտնել «ԴԵՄ ԵՄ» շարժմանը, որ 4 ոչիշխանական խմբակցություններին ստիպեցին դիմել ՍԴ։ Հակոբյանը դժգոհել է, որ 4 տարի չեն կարողացել այս հարցով բանավեճ իրականացնել, և այժմ, ի վերջո, այդ հնարավորությունն ընձեռվել է։

Այնուհետև նա մանրամասն ներկայացրել է, թե ինչու էր անհրաժեշտ կիրառել կենսաթոշակային պարտադիր բաղադրիչը՝ ավելացնելով

–Անգամ եթե մեր պետությունը զարգանա, և այլմոլորակային սկզբունքներով թռիչքային զարգացում կարողանանք ապահովել, միևնույն է, մենք պետք է անցնեինք այս համակարգին։

Որոշ ժամանակ անց ՍԴ նախագահ Գագիկ Հարությունյանն ասել է, որ ստիպված է ընդհատել Հակոբ Հակոբյանին, քանի որ բարձր դատարանում քննարկվում է ոչ թե պարտադիր կուտակային համակարգի անհրաժեշտության, այլ սահմանադրականության հարցը։

–Հատուկ այդքան ժամանակ դրան նվիրել, կարծում եմ, տեղին չէ,–ընդգծել է Գ. Հարությունյանը։

7or.am