ԱԺ ՀԱԿ խմբակցության պատգամավոր Լյուդմիլա Սարգսյանը խորհրդարանում անդրադառնալով «Սևանա լճի էկոհամակարգի վերականգնման, պահպանման, վերարտադրության և օգտագործման միջոցառումների տարեկան ու համալիր ծրագրերը» հաստատելու մասին ՀՀ օրենքում լրացումներ կատարելու նախագծին` ասել է, որ լճից լրացուցիչ ջուր վերցնելու պատճառներն անտրամաբանական են։

–Պարզագույն մարդկային լեզվով ասած՝ գործ ունենք ընդամենը հերթական կոռուպցիոն ծրագրի հետ: Ընդ որում, կարող ենք մտածել, որ կոռուպցիոն գործարքները հասնում են միջազգային ծավալների, իսկ ավելի կոնկրետ՝ հայ-ադրբեջանական միջկառավարական մակարդակով իրականացվող համակարգային կոռուպցիայի, որտեղ տուժում են Հայաստանն ու հայ ժողովուրդը, իսկ ադրբեջանական կողմը՝ օգտվում,–ասել է Լ. Սարգսյանը:

Կետ առ կետ բերելով իր ասածի հիմնավորումները՝ նա առաջարկել է կասեցնել այս օրինագծի քննարկումը, մինչև կառավարությունը ներկայացնի իր նշած հարցադրումների վերաբերյալ գիտական ուսումնասիրությունների վրա հիմնված խորքային հիմնավորումներ:

–Հակառակ դեպքում՝ կարող ենք վստահորեն պնդել, որ գործ ունենք ոչ թե ոռոգման կարիքների բավարարման, այլ պարզապես կոռուպցիոն դրսևորումների հետ: Վերջում մեկ հռետորական հարց՝ է՞լ ում է ձեռնտու, որ Սևանից ու մեր այլ ջրային ավազաններից հնարավորինս շատ ջուր դուրս բերվի, և արդյոք այդ ջուրը հենց այնպես նվիրաբերվում է մեր թշնամի Ադրբեջանի՞ն, թե՞ կոռուպցիան ազգեր ու սահմաններ չի ճանաչում,–ասել է Լ, Սարգսյանը:

7or.am