Ապրիլի 27-ին Կանադայի Վանկուվեր քաղաքում տեղի ունեցավ Հայոց ցեղասպանության զոհերին նվիրված հուշարձանի բացման արարողությունը: Հանդիսավոր բացմանը մասնակցեցին Կանադայում ՀՀ դեսպան Արմեն Եգանյանը, Կանադայի դաշնային, Բրիտանական Կոլումբիայի նահանգային և Վանկուվերի մունիցիպալ մարմինների ներկայացուցիչներ, Կանադայի հայ համայնքի հոգևոր, համայնքային առաջնորդներ:

Իր ելույթում դեսպան Եգանյանը կարևորեց Օսմանյան Թուրքիայի կողմից սպանված 1.5 միլիոն անմեղ զոհերի հիշատակին նվիրված հուշարձանի բացումը Վանկուվերում` Հայոց ցեղասպանության 100-ամյա տարելիցին ընդառաջ:

Հայոց ցեղասպանության զոհի արխիվացված մատնահետքը պատկերող հուշարձանի հեղինակն է Մաթիլտա Ասլիզադեն: Մունիցիպալ այգու տարածքում տեղակայված հուշարձանը, նախատեսված Հայոց ցեղասպանության 100-ամյա տարելիցի միջոցառումների ծրագրով, եկավ լրացնելու Կանադայի Մոնրեալ, Լավալ, Տորոնտո և այլ քաղաքներում գտնվող Մեծ Եղեռնը ոգեկոչող հուշարձանների շարքը: