ԱԺ կառավարության հետ հարցուպատասխանի ժամին Հայ ազգային կոնգրես խմբակցության ղեկավար Լեւոն Զուրաբյանը հարց ուղղեց ԱԳ նախարար Էդվարդ Նալբանդյանին: Նա նշեց, որ իշխանությունները եւ, մասնավորապես, կառավարությունը վարվող քաղաքականության վերաբերյալ տեղեկատվություն տրամադրելու հարցում թափանցիկ չէ:

«Խոսքս, մասնավորապես, այն մասին է, որ համաձայն որոշ տեղեկությունների՝ Հայաստանը ոչ թե Մաքսային միության պայմանագրերը պետք է ստորագրի, այլ միանգամից՝ Եվրասիական միությանը անդամակցելու մասին պայմանագրերը, որ հանձնարական են տվել, ԱԳՆ-ն զբաղվում է, եւ մենք պիտի Մինսկում կայացած այսօրվա հանդիպմանը մասնակցեինք: Այդ հանդիպումը տեղի չունեցավ, բայց որեւէ բացատրություն ՀՀ իշխանություններից չստացանք»,- նշեց Զուրաբյանը՝ հավելելով, որ սա եզակի դեպք չէ: Նա հիշեցրեց, որ իշխանությունների որդեգրած այդ ոճին մենք ականատես եղանք հայ-թուրքական արձանագրությունների ժամանակ, որ դրանց համաձայնեցման մասին տեղեկատվությունը հրապարակվեց 2009-ի ապրիլի 22-ին, սակայն գործընթացը գաղտնի պահվեց:

Հետո հիշեցրեց, որ նույն խնդիրը ունեցանք նաեւ Եվրամիության հետ բանակցելիս, նաեւ՝ Մաքսային միություն մտնելու որոշման հետ կապված:

«Մենք Լուկաշենկոյից ենք իմանում, որ Հայաստանը 126 կետից 111-ը կատարել է: Այնպիսի տպավորություն է, որ դուք ավելի շատ ցանկանում եք հաշվետու լինել Մոսկվային, Վաշինգտոնին, Բրյուսելին, քան սեփական ժողովրդին: Ինչո՞ւ մենք այդ տեղեկատվությունը պետք է ստանայինք Բելառուսի նախագահից, այլ ոչ թե ԱԳՆ-ից կամ վարչապետից՝ այս դահլիճում»,- հարցրեց Զուրաբյանը:

Ի պատասխան՝ Նալբանդանը հայտարարեց, թե Մինսկում կայացած գագաթնաժողովին Հայաստանի մասնակցության վերաբերյալ ԱԳՆ խոսնակը երեկ համապատասխան բացատրություն տվել է, այն է՝ Մինսկում կայացել է երեք երկրների՝ ՌԴ-ի, Բելառուսի եւ Ղազախստանի մասնակցությամբ եվրասիական տնտեսական բարձր խորհրդի նիստը, որին Հայաստանը դեռ մաս չի կազմում, եւ որ հենց այդ պատճառով էլ այնտեղ երեք նախագահներ էին: «Իսկ Հայաստանի ճանապարահային քարտեզի իրականացման մասին ասեմ, որ ըստ օրակարգի՝ այդ հարցը ներկայացրել էր եվրասիական տնտեսական հանձնաժողովի նախագահ Խրիստենկոն, որը դա արեց: Եթե դուք զուգահեռ եք անցկացնում հայ-թուրքական կամ Ասոցացման համաձայնագրի հետ, ապա ասեմ, որ աննախադեպ էր, որ հայ-թուրքական արձանագրությունները հրապարակվեցին ստորագրումից վեց շաբաթ առաջ, քանի որ միջազգային պրակտիկայում ընդունված չէ, որ ստորագրելուց առաջ որեւէ բան հրապարակվի»,- հայտարարեց Նալբանդյանը՝ հավելելով, թե մյուս բոլոր հարցերի հետ կապված «բազմաթիվ հայտարարություններ եւ քննարկումներ են եղել»:

Լեւոն Զուրաբյանը նորից հարցը հստակեցրեց՝ նշելով, որ իր հարցը ոչ այնքան տեխնիկական էր, որքան բովանդակային: «Մեզ համար կարեւոր է տեղեկություն ստանալ իշխանությունից՝ ընդհանուր ուղղության մասին: Օրինակ՝ երբ մենք Ֆյուլեի հետ խոսում էինք, նա բերեց օրինակ, որ Ուկրաինայի ԱԳ նախարարը ԱԺ-ում, ոչ ամբողջական տեքստը, իհարկե, բայց ընդհանուր գծերով ներկայացրել է այդ փաստաթուղթը: Հարցը այն մասին է, որ չստացվի՝ առավոտյան արթնանանք եւ իմանանք, որ հայտնվել ենք եվրոասոցացման ուղղության մեջ, կամ՝ հակառակը: Հարցն այն մասին է, որ այս բոլոր հարցերը ստանան լայն հնչեղություն, որ այս հարցերը լուրջ հասարակական դեբատների առարկա դառնան, պարզ լինի, թե որոնք են ձեր փաստարկները: Այ դա է, որ չենք տեսնում, ասես՝ ժողովրդին չեք ուզում մասնակից դարձնել այս գործընթացներին, այլ որոշումները կայացնում եք ժողովրդի թիկունքում»,- նշեց Զուրաբյանը:

Ի պատասխան՝ Նալբանդյանը հայտարարեց, թե Ուկրաինայի ԱԳ նախարարը փաստաթուղթը հրապարակել էր նախաստորագրումից հետո, եւ որ իրենք էլ նույնը պետք է անեին, եթե Հայաստանը նախաստորագրեր համաձայնագիրը:
Աղբյուրը՝ ilur.am