«Օրերս «Հարավկովկասյան երկաթուղիներ»-ի ղեկավար Վիկտոր Ռեբեցը հայտարարել էր, թե Գյումրիի դեպոյի մեքենավարները մարտ ամսին ստացել են 280 հազար դրամ աշխատավարձ։ Սա ասվեց այն բանից հետո, երբ Գյումրիում իրենց աշխատանքային պայմաններից դժգոհ մեքենավարները բողոքի ակցիա անցկացրեցին։

Սակայն Վիկտոր Ռեբեցի հայտարարությունը ընդամենը յուղ լցրեց կրակի վրա։
Երեկ երկաթուղայինները լրագրողներին ներկայացրել են իրենց աշխատավարձերի թերթիկները, որով վճարվում են։ Համաձայն այդ թերթիկների` իրենք նշված գումարից առնվազն 100-120 հազար դրամ պակաս են ստանում։

«Իրենց թղթաբանությամբ բարձր են ցույց տալիս աշխատավարձերը, պարոն Ռեբեցը ստում է, որովհետև մենք փաստացի էդքան փող չենք ստացել»,-հայտարարել են երկաթուղայինները։ Վերջիններս երկու փաստաթուղթ են ցույց տվել` մեկն իրենց աշխատավարձերի թերթիկները, մյուսը՝ տեղեկանք, որը հաշվապահությունը ներկայացնում է տրանսպորտի նախարարություն ու երկաթուղու ղեկավարությանը։ Այս երկու փաստաթղթերում տարբեր թվեր էին: Իրականում աշխատավարձերի թերթիկներում այն ավելի պակաս է։
Այժմ երկաթուղայինները մտադիր են այս փաստաթղթերը իրավապահ մարմիններին ներկայացնել։

Այժմ, եթե երկաթուղայինների պահանջները չբավարարվեն, նրանք անժամկետ գործադուլի կանցնեն։ Թեպետ, դատելով նրանց աշխատավարձերից, համարյա գործադուլի մեջ են»,–գրում է «Չորրորդ իշխանությունը»-ը։

Մանրամասները՝ թերթի այսօրվա համարում։