ԳԱԼԱ–ի փոխանցմամբ՝ ԼՂՀ նախագահի մամլո խոսնակ Դավիթ Բաբայանի կարծիքը ԵԱՀԿ Մինսկի խմբի համանախագահ Ջ. Ուորլիքի հայտարարության վերաբերյալ այսպիսին է. «Հակամարտությունը պետք է այնպես կարգավորվի, որպեսզի հետագայում լինի, այսպես ասած, ամուր խաղաղություն եւ կողմերից որեւէ մեկը չգայթակղվի մյուս կողմի թույլ կողմերով, կամ խոցելի ուղղություններով, որ հնարավոր լինի նրա համար սկսել նոր պատերազմ: ԼՂՀ անվտանգության համակարգը ներկա դրությամբ լիովին բավարարում է մեր պետության անվտանգությանը: Պատմությունը մեզ ցույց է տվել, որ Ադրբեջանը գայթակղվել է, քանի որ մենք եղել ենք շրջափակված, եւ սկսվել է պատերազմը, եւ որեւէ մեկը, որեւէ արտաքին ուժ չի կարողացել կանգնեցնել պատերազմը: Պատերազմը կանգնեցրել ենք մեր իսկ սեփական արյունով, հետեւաբար, քսան տարի արդեն պահպանվում է այն, ինչ կա, լավ կամ վատ, պահպանվում է: Այո, կան կրակոցներ, եւ, դժբախտաբար, զոհվում են մարդիկ, համեմատությունս գուցե տեղին չլինի, բայց սահմանում ավելի քիչ մարդ է զոհվում, քան ճանապարհատրանսպորտային պատահարներից: Մենք տեսել ենք պատերազմը, տեսական մոտեցումները չեն գործում, մեզ որեւէ մեկը չի կարող համոզել, թե գիտեք՝ վերադարձը կարող է նոր պատերազմից խուսափում լինի, իսկ միգուցե խուսափենք այդ պատերազմից, ու Արցախը ոչնչանա, ո՞վ է մեզ երաշխիք տալու, կամ ի՞նչ երաշխիք պետք է ուզենք մենք որեւէ մեկից, եթե հենց մենք ենք այդ երաշխիքի ապահովողները»,-նշեց Դավիթ Բաբայանը:

Ըստ նրա՝ յուրաքանչյուր հակամարտություն խաղաղ ճանապարհով լուծելու դեպքում կողմերը պետք է գնան փոխզիջումների, ինչին, մեղմ ասած, այժմ երկու կողմերն էլ պատրաստ չեն: Ուստի նա գտնում է, որ Ջ.Ուորլիքի հայտարարությամբ առանձնապես անհանգստանալ պետք չէ. այն հնարավոր է՝ հենց առաջիկայում էլ փոփոխության ենթարկվի:

«Յուրաքանչյուր հակամարտություն եթե ուզում են լուծել խաղաղ ճանապարհով, պետք է լինի փոխզիջում: Ղարաբաղի վերադարձը փոխզիջում չէ, զիջում է, այն էլ՝ կապիտուլյացիայով, չեմ կարծում, թե ճնշումներ կլինեն, սա ուղղակի ԱՄՆ տեսլականն է, որը հնարավոր է՝ փոխվի: Աշխարհում ոչ մի հստակ բան չկա, որ հարատեւի հազարամյակներ շարունակ: Մենք կարծում ենք, որ տարիներ, տասնամյակներ կպահանջվեն մինչեւ իրավիճակը կարգավորվի, մանավանդ որ Ադրբեջանում որեւէ փոխզիջում չեն տեսնում: Այնտեղի ոստիկաններն ասում են` մենք կխմենք հայերի արյունը, հետեւաբար պետք է այս ամենը թարմացվի, շատ բաներ, մոտեցումներ ինչ-որ կերպ վերահստակեցվեն, քանի որ սա այնպիսի մի իրավիճակ է, որ պայթյունավտանգ կարող է լինի, եթե փոփոխվի տարածաշրջանում ուժերի հավասարակշռությունը եւ կողմերից մեկը ստանա առավելություն մյուսի նկատմամբ»,-գտնում է Դավիթ Բաբայանը:

Մանրամասները՝ ԳԱԼԱ–ում։