Սույն նամակի համար շարժառիթ են հանդիսացել աշխարհասփյուռ հայության միահամուռ ջանքերով ազատագրված Արցախի շուրջ ձևավորվող վտանգավոր զարգացումները, որոնց վերաբերյալ բացահայտ անընդունելի կարծիքներ են արտահայտվում այսօր ԵԱՀԿ Միսկի խմբի երկրների ներկայացուցիչների կողմից: Զարգացող գործընթացները խիստ մեծացնում են տարածաշրջանային լարվածությունը` ընդհուպ հրահրելով հնարավոր պատերազմական գործողությունների զարգացումներ:

ԵԱՀԿ Մինսկի խմբի ԱՄՆ ներկայացուցիչ Ջեյմս Ուորլիքի վերջերս կատարած տխրահռչակ հայտարարությունից հետո, որը տարածաշրջանում պատերազմ հրահրելու բացահայտ կոչի էր նմանվում, հետևեց նաև Եվրասիական տնտեսական հանձնաժողովի Զարգացման և ինտեգրացիայի դեպարտամենտի Միջազգային գործակցության բաժնի պետ Անտոն Ազարովի հայտարարությունն Աստանա-Մոսկվա-Մինսկ-Երևան տեսակամուրջի ժամանակ, որտեղ ներկայացվեց Արցախը Հայաստանից մեկուսացնելու հստակ ծրագիր: Վերջինս մասնավորապես նշել է, որ Եվրասիական տնտեսական միությանը Հայաստանի անդամակցելուց հետո միության ընդհանուր սահմանը կանցնի ՀՀ ընդունված սահմաններով, իսկ Եվրասիական միությանն Արցախի անդամակցության հարցը նույնիսկ չի քննարկվել: Ազարովը նաև հայտարարել է, որ միության ստեղծման վերաբերյալ պայմանագիրը կստորագրվի մայիսի 29-ին. ինչպես և նախատեսվել էր, առանց որևէ հետաձգումների:

Այս ամենին եթե ավելացնեք ԵԱՀԿ Մինսկի խմբի անդամ հանդիսացող Ֆրանսիայի նախագահի օրեր առաջ Բաքվում կատարած հայտարարություներն Արցախի խնդրի վերաբերյալ, ապա պատկերը կամբողջանա: Որպես եզրակացություն ստացվում է, որ ճնշումները Հայաստանի և Արցախի հանդեպ հասել են գագաթնակետին, և մենք վերածվել ենք առանց լուրջ միջազգային աջակցություն ունեցող պետության, քանի որ նմանատիպ գնահատականները հակամարտության խաղաղ ճանապարհով հարցի լուծման հետ որևէ աղերս չունեն. այն հիշեցնում է դասական իմաստով շանտաժ` պատերազմի սպառնալիքներով:

Ազգային անվտանգությանը սպառնացող վերը թվարկած փաստերի առկայությունն էր, որ ստիպեց Եվրոպայի Հայկական Միությունների Ֆորումի /ԵՀՄՖ/ նախագահությանը հանդես գալ հայտարարությամբ` Արցախն անհապաղ Հայաստանին միավորվելու երկուստեք համակարգված գործընթաց սկսելու պահանջով: Արցախի խնդրով զբաղվող միջնորդական առաքելություն իրականացնող երկրների ներկայացուցիչների պաշտոնական հայտարարություններն այլ ելք չեն թողնում` քան 2 հայկական պետությունների միավորումը: Հետևանքների ողջ պատասխանատվությունը դեյուրե և դեֆակտո կրում են հենց ՄԱԿ-ի հովանու տակ գործող ԵԱՀԿ Մինսկի խմբի համանախագահ երկրները:

դոկ. Աշոտ Գրիգորյան,

ԵՀՄՖ-ի նախագահ