Գերմանիայի Դաշնային Հանրապետության նախագահ պարոն Յոախիմ Գաուքը ի ճանաչումն Գերմանիայի Դաշնային Հանրապետության հանդեպ ունեցած վաստակի պարգևատրել է պարոն Ալեքսան Տեր-Մինասյանին ԳԴՀ Արժանյաց կարգի խաչ շքանշանով՝ ժապավենի վրա։

Պատվավոր պարգևը 2014 թվականի մայիսի 15-ին Գյումրիում պարոն Տեր-Մինասյանին հանձնեց Հայաստանում ԳԴՀ դեսպան պարոն Ռայներ Մորելը։

Պարոն Ալեքսան Տեր-Մինասյանը 1993 թվականից ի վեր ղեկավարում է Գերմանական կարմիր խաչի Գյումրու ներկայացուցչությունը, որտեղ «Մոր և մանկան կենտրոն» է ստեղծվել։ Կենտրոնի հետագա ֆինանսավորումն ապահովելու համար շենքի մի հատվածը հետագայում վերածվել է հյուրանոցի, որն այսօր հայտնի է որպես «Բեռլին Արտ Հոթել»։ Պարոն Ալեքսան Տեր-Մինասյանն իր ակտիվ մասնակցությունն է ցուցաբերում նաև հայ-գերմանական մշակութային փոխգործակցության հարցում։ Նա արդեն միմյանց հետ շփվելու հնարավորություն է ընձեռել բազմաթիվ արվեստագետների, կազմակերպել բազմապիսի ցուցահանդեսներ և փառատոններ թե´ Գերմանիայում և թե´ Հայաստանում։ «Արթբոգեն» գերմանախոսների մշակութային կենտրոնի ստեղծմամբ նա կյանքի է կոչել մշակութային մի միություն, որը Գյումրիում գերմաներենն ու գերմանական մշակույթը ներկայացնելու առաքելություն ունի, ինչին ավանդաբար մեծ կարևորություն է տրվում այս տարածաշրջանում։

Երևանում Գերմանիայի Դաշնային Հանրապետության դեսպանություն