Անդրադառնալով 100% համամասնական ընտրակարգին անցնելու ՀՅԴ–ի նախագծին՝ «Բարգավաճ Հայաստան» խմբակցության քարտուղար Նաիրա Զոհրաբյանը հայտարարել է, որ ԱԺ–ում այդ հարցի քննարկումն իրեն արդեն հիշեցնում է «День сурка» հայտնի ֆիլմը։

–Եթե այստեղ ներկա գտնվեին Վենետիկի հանձնաժողովի մեր գործընկերները, ժողովրդավարական երկրների մեր գործընկերները, որոնց հետ բազմիցս խոսել ենք այս հարցի շուրջ, նրանց համար բացարձակ հասկանալի չէր լինի այս դիլեման և խնդիրը, որ մենք այստեղ քննարկում ենք: Նրանց համար կա մեկ խնդիր՝ ընտրությունները պետք է լինեն ազատ և արդար՝ անկախ նրանից՝ դրանք անցկացվում են համամասնակա՞ն, թե՞ մեծամասնական ընտրակարգով: Բայց նրանք չեն հասկանում որևէ կերպ, թե ինչի՞ է ընդունակ իշխանությունը, որը մտադիր է կեղծել ընտրությունները: Ինչպիսի ոսկերչական մակարդակով կարող են այդ կեղծիքներն անել, որ հանրահայտ «d'birs» ոսկերչական կազմակերպությունը կնախանձեր ոսկերչական կեղծված այդ մակարդակին։ Ուստի, ԲՀԿ-ն միանշանակ պաշտպանում է մեր գործընկերների առաջարկած մոդելը, որովհետև դա նաև մեր նախընտրական ծրագրի խոստումներից է,–ասել է Ն. Զոհրաբյանը:

Նա նաև համաձայնել է, որ խնդիրը ոչ թե համամասնական կամ մեծամասնական ընտրակարգն է, այլ որ անցկացվող ընտրությունները լինեն ազատ.

–Բայց մենք գիտենք, որ ի սկզբանե իշխող կուսակցությունը հիմնականում 41 մանդատ ցանկացած ընտրությունից առաջ ստարտային վիճակում ունի իր գրպանում: Մեծամասնական պատգամավորի վրա դրված է քվոտա` այնքան ձայն բերեցիր քե՛զ, այդքան ձայն պարտավոր ես բերել քո՛ համամասնական ցուցակին: Բերել ցանկացած գնով, բերել ամեն ճանապարահով, և, բնականաբար, այն ճանապարհը, թե ինչպես են բերում այդ ձայները, ինչպես է տեղի ունենում ընտրությունը, բոլորիս է հայտնի:

ԲՀԿ–ական պատգամավորը նշել է, որ ճիշտը այն ընտրական համակարգն է, որն ապահովում է ազատ և արդար ընտություններ: Բայց այնպիսի երկրներում, ինչպիսին մերն է, Ն. Զոհրաբյանի համոզմամբ, ստիպված են գնալու այս ճանապարհով՝ փորձելով գոնե այդ կերպ կայացնել կուսակցական համակարգը։

–ԲՀԿ-ն կողմ է քվերակելու այս նախաձեռնությանը,–եզրափակել է Ն. Զոհրաբյանը:

7or.am