ԱԺ ՀԱԿ խմբակցության քարտուղար Արամ Մանուկյանը Կառավարության ծրագրի քննարկման ժամանակ հայտարարել է, որ այս Կառավարությունն ի վիճակի չէ լուծելու Հայաստանի առաջ կանգնած խնդիրները:

–Մենք չենք վստահում այն կառավարությանը, որը նշանակվել է ոչ օրինակարգ իշխանության, ոչ օրինակարգ Սերժ Սարգսյանի կողմից: Մենք ամենևին մասնակից չենք և չենք ուզում համագործակցել ոչ լեգիտիմ, կեղծված ընտրություններ անցկացնող քաղաքական ուժի, նրա շտաբի պետի հետ,-ասել է Արամ Մանուկյանը:

Նա ավելացրել է, որ Կառավարությունը ձևավորվել է բիզնես ծրագիր իրականացնելու նպատակով, իսկ ՀԱԿ–ը բիզնես ծրագրերի և հարստանալու, սեփական բարեկեցությունը բարելավելու կողմնակից չէ.

–Մենք դրա դեմ պայքարողն ենք: Դուք մեզ մեղադրում եք «ինչքան վատ, այնքան լավ» գործելաոճի համար: Բացարձակ անհիմն մեղադրանք է, որովհետև նման մեղադրանք մեզ չեն կարող տալ այնպիսի մարդիկ, ովքեր իշխանությունն ամբողջութամբ օգտագործել են սեփական բարեկեցության համար: Դուք ո՞ր արդարության, հանդուրժողականության մասին եք խոսում, երբ որ դեպքերը, օրենքները շատ կոնկրետ են, որ ուղիղ որոշակի մարդկանց շահերն եք պաշտպանում։

Ա. Մանուկյանը հավելել է, որ համակարգի գլխին կանգնած է Սերժ Սարգսյանը, և թելադրողը նա է:

–Դուք չեք կարող մենաշնորհների դեմ, կոռուպցիայի դեմ պայքարել, քանի որ այդ համակարգը ձերը չի. այդ համակարգը վերևում կարգավորված համակարգ է,-ասել է Ա. Մանուկյանը:

7or.am