ՀՀ ԱԺ «Ժառանգություն» խմբակցության ղեկավար Ռուբեն Հակոբյանը երեկ Աստանայում Ղազախստանի նախագահ Նուրսուլթան Նազարբաևի հնչեցրած հայտարարությունը բնական է համարում։

–Պետք չէ հայհոյել ու քննադատել. յուրաքանչյուրն առաջնորդվում է ի՛ր պետական, ազգային շահով: Հայաստանի շահն էլ այն է, թե որքանո՞վ Արցախը կլինի Հայաստանի հետ,–ասել է Ռ. Հակոբյանը՝ հավելելով, որ եթե այդ հարցը չի լուծվում, մեր երկիրն իր որոշումները վերանայելու խնդիր ունի.

–Հայաստանի իշխանության կողմից ինչ-որ արձագանք պետք է լինի։ Նման բան ասվել էր նաև Մինսկում, Ղազախստանն էլ մի քանի անգամ նման հայտարարություն հնչեցրել է: Պարզապես, եթե Հայաստանի հետ պայմանների լեզվով են փորձում խոսել, պետք է պատրաստ լինել և համարժեք քայլեր ձեռնարկել։

Նա անընդունելի է համարում տարբեր կառույցներում Արցախը Հայաստանից անջատելը, քանի որ Արցախը՝ որպես ինքնիշխան պետություն, չի զիջում ոչ Կոսովոյին, ոչ էլ Ղրիմին։

–Հայաստանի դիվանագիտությունը լրջագույն սխալներ է թույլ տվել և իր սխալների համար չպետք է մեղադրի ուրիշներին: Մեր ազգային անվտանգության և պետության հետագա զարգացման առումով մենք կանգնած ենք լրջագույն մարտահրավերների առաջ,–ասել է Ռ. Հակոբյանը:

7or.am