«Միկոյանի կերպարն այնպիսին է, ինչպիսին որ Ստալինինը, Բերիայինն ու մյուսներինն է: Նա ոչնչով չի տարբերվում։ Թեև ներկայիս երիտասարդներին Անաստաս Միկոյանի անունը որևէ բան չի ասում, սակայն նախորդ սերնդի համար նա ստալինյան ֆունկցիոներներից մեկն է»,–այսօրվա ասուլիսին, անդրադառնալով Միկոյանի արձանի տեղադրման խնդրին, ասել է Հայաստանում Լեհաստանի արտակարգ և լիազոր դեսպան Զդիսլավ Ռաչինսկին:

Հարցին, թե արդյոք լեհական կողմը հայ պաշտոնյաներին իր մտահոգությունը հայտնե՞լ է, թե ինչպես կարելի է Կատինի զանգվածային գնդակահարութան կազմակերպիչներից՝ Միկոյանի արձանը տեղադրել, դեսպանը պատասխանել է. «Միկոյանը բացասաբար է ընկալվել թե՛ հայկական, թե՛ լեհական պատմության մեջ: Մենք հայ քաղաքական գործիչների հետ այդ մասին չենք խոսում, քանի որ դա հայերի և Երևանի բնակիչների խնդիրն է։ Իսկ պատմական փաստերը բոլորիս հայտնի են»։