Ավանդույթի համաձայն Հայաստանի ազգային օլիմպիական կոմիտեն, ՀԱՕԿ նախագահ Գագիկ Ծառուկյանի գլխավորությամբ, Երեխաների պաշտպանության միջազգային օրը հերթական անգամ մեծ շուքով և հանդիսավորությամբ տոնեց: «Մենք ապագա օլիմպիականներն ենք» մարզամշակութային միջոցառմանն այս տարի մասնակցեցին Երևանի 12 վարչական շրջանների 23 նախադպրոցական ուսումնական հաստատությունների ավելի քան 150 երեխաներ: Մեկ հարկի ներքո համախմբված հարյուրավոր փոքրիկների հետ տոնը նշելու էր եկել նաև Գագիկ Ծառուկյանը՝ հայ չեմպիոնների հետ միասին:
Նախաձեռնության գլխավոր նպատակն է մեծացնել երեխաների հետաքրքրությունը սպորտի նկատմամբ, նպաստել օլիմպիական գաղափարների տարածմանը: Միջոցառման մեկնարկին փոքրիկները ներկայացրեցին օլիմպիական խորհրդանիշները, ապա զեկուցում ՀԱՕԿ նախագահին՝ մրցապայքարին մասնակցելու համար պատրաստ են:
«Երեխաներն են մեր ապագան ու վաղվա օրը կերտողները: Մեր բոլորի խնդիրը պետք է լինի նրանց համար բարեկեցիկ ու արժանապատիվ կյանք ապահովելը»,-շնորհավորելով երեխաներին՝ նշեց Գագիկ Ծառուկյանը: Հայրենական սպորտի ղեկավարն ընդգծեց, որ արժանի քաղաքացիներ դաստիարակելու գործում անփոխարինելի է հատկապես մանկավարժների դերը:
«Մեր բոլորի ցանկությունը մեկն է՝ երեխաների համար կառուցել ուժեղ, հզոր, զարգացող ու բարեկեցիկ Հայաստան: Այս ճանապարհին անելիք ունի մեզանից յուրաքանչյուրը»,-նշեց ՀԱՕԿ նախագահը:
Մրցապայքարի 5 մարզաձևերում թեժ պայքարի արդյունքում հաղթող ճանաչվեցին ուժեղագույնները: Նրանց հետ միասին ՀԱՕԿ նախագահ Գագիկ Ծառուկյանի անունից նվերների ու մրցանակների արժանացան մասնակից բոլոր երեխաները:
«Այս փոքրիկների շարքերում են վաղվա օլիմպիական չեմպիոններն ու հայրենիքի պատիվը բարձր պահող քաղաքացիները. նրանց տաղանդը հենց մանուկ հասակից է պետք բացահայտել»,-իրենց ելույթներում համոզմունք հայտնեցին հայ չեմպիոնները:
Հայ փոքրիկների հանդեպ ուշադրությունը շարունակական է լինելու: Ցանկությունը մեկն է՝ երջանիկ մանկություն ու արժանապատիվ ապագա աշխարհի բոլոր մանուկներին: