Այսօրվա ասուլիսին «Կ. Դեմիրճյանի անվան մարզահամերգային համալիր» ՓԲ ընկերության ներկայացուցիչ Կորյուն Գրիգորյանը նշել է, որ կառույցն աճուրդի հանելն անօրինական է։ Ըստ նրա՝ աճուրդը հայտարարելու հործընթացն ընթացել է խախտումներով.

«Որոշակի ուժեր շահագրգռված են, որ համալիրը հանեն աճուրդի և վաճառեն ձեռնտու գնով: Ունենք շատ վտանգավոր խնդիր, քանի որ օտարերկրյա ներդրում էլ կա, և վիճակը կհանգեցնի նրան, որ որևէ ծրագրի շրջանակում մարդիկ չեն ցանկանա օտարերկրյա ներդրումներ կատարել»,–նշել է նա՝ ավելացնելով, որ ժամանակի ընթացքում 42 մլն դոլարի չափով կատարված ներդրումները չեն նշվում։ Գրիգորյանը կարևորել է այն հանգամանքը, որ անհրաժեշտ է վարկերը մարելու ժամանակացույց տրամադրել.

«Պատասխանատվությամբ ենք մոտենում հարցին և երբեք չենք հայտարարել, որ չենք մարելու վարկերը: Պետք չէ համալիրին մոտենալ որպես մեկսենյականոց բնակարանի և առանց գնահատելու՝ գումար սահմանել»,–ասել է նա։

Իր հերթին ընկերության փաստաբան Արմինե Հակոբյանը լրագրողներին տեղեկացրել է, որ ԴԱՀԿ-ը օրենք է խախտել. «Մինչդեռ ԴԱՀԿ-ը հենց խորհրդատվություն ստանալու ծանուցմամբ է դիմել դատարան: Այս պահին հարցը քննվում է վերաքննիչ դատարանում, և օրինական ուժի մեջ չմտած որոշումով ԴԱՀԿ-ն առաջին աճուրդի չկայացումից հետ կրկնաճուրդ է հայտարարում», – ասել է նա՝ հավելելով, որ դիմել են Կառավարությանը՝ ճշտելու՝ ինչ չափորոշիչներով պետք է համալիրի աճուրդի համար գին սահմանվի՝ հաշվի առնելով այն հանգամանքը, որ կառույցը պատմամշակութային հուշարձան է։ Ի պատասխան՝ նրանց տեղեկացրել են, որ խնդրի վերաբերյալ համապատասխան հանձնաժողով պետք է ստեղծվի։

«Սակայն մինչ հանձնաժողովը կսահմանի գինը, ԴԱՀԿ-ն ընդամենը որպես կառույց է գին սահմանել` առանց հաշվի առնելու կառույցի արժեքը», – պարզաբանել է փաստաբանը։