Սեպտեմբերի 1-ին խորհրդարանի ֆինանսավարկային և բյուջետային հարցերի մշտական հանձնաժողով էին այցելել Գերմանական տեխնիկական համագործակցության ընկերության (GTZ-ի) ծրագրերի տնօրեն Ջեյմս Մակբեթ Ֆորբսը և Հայաստանում ԳԴՀ գործերի ժամանակավոր հավատարմատար Մելանի Մոլթմանը՝ հանձնաժողովի պատգամավորներին և աշխատակազմին համակարգչային տեխնիկա տրամադրելու նպատակով: 

 Գերմանական տեխնիկակական համագործակցության ընկերության ներկայացուցիչներին ողջունեց և Ազգային ժողովի նախագահի, ինչպես նաև  Ազգային ժողովի անունից աջակցության համար շնորհակալություն հայտնեց խորհրդարանի փոխնախագահ Սամվել Նիկոյանը: Նա նկատեց, որ 2008 թ.-ին ստորագրված՝ խորհրդարանի հետ համագործակցության հուշագրի շրջանակներում իրականացվող  ծրագրերը, ինչպես նաև GTZ-ի  բոլոր նախաձեռնությունները Հայաստանում հաջողված են ու արդյունավետ:  Նա հույս հայտնեց, որ Ազգային ժողովի հետ համագործակցությունը շարունակական բնույթ կունենա և փոխանցեց խորհրդարանի պատրաստակամությունը այն էլ ավելի զարգացնելու համար: 

ԱԺ ‎ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանը ևս  շնորհակալություն հայտնեց տեխնիկական օժանդակության համար և ընդգծեց, որ գերմանական կազմակերպության հետ հանձնաժողովը համատեղ աշխատանքի արդյունավետ փորձ ունի: Որպես համագործակցության  լավ օրինակ նա մատնանշեց «Վերահսկիչ պալատի մասին» գործող օրենքը, որի կիրառման երկու տարիների ընթացքում փոփոխություն որևէ  առաջարկ չի ստացվել՝ չնայած օրենքի կարգավորման լայն դաշտին: ԱԺ մշտական հանձնաժողովի նախագահը համագործակցության ծրագիրը խոստումնալից գնահատելով՝ առաջարկեց հաջորդ փուլերում մասնագիտական կարողությունների բարելավմանն ուղղված միջոցառումներ ևս իրականացնել: 
  
Մելանի Մոլթմանը զրույցի ընթացքում ընդգծեց ԱԺ ֆինանսավարկային և բյուջետային հարցերի մշտական հանձնաժողովի գործառույթների կարևորությունը՝ հատկապես բյուջեի նկատմամբ վերահսկողությունը, և այն լավագույնս իրականացնելու համար աջակցելու պատրաստակամություն հայտնեց: