Այն, որ Սերժ Սարգսյանը քեֆչի է, գիտեն շատերը։ Նրա քեֆչիության ու ախորժակի, ինչպես նաև խմիչքի հանդեպ անտարբեր չլինելու (մեղմ ասած) մասին առասպելներ են շրջում։

Սերժ Սարգսյանը շատ է սիրում հատկապես «քաղաքական» քեֆի սեղանները։ Նա կուսակիցների հետ պարբերաբար ուտուշ–խմուշներ է կազմակերպում։ Նպատակը տվյալ դեպքում միայն հաց ուտելը, «մին լյավ» խմելն ու տակտից ընկած տրնգի պարելը չէ։

ՀՀԿ ղեկավարը կոնկրետ գաղափարախոսության և սկզբունքների կրող չէ։ Նրա համար կուսակցությունը միջոց է միանձնյա իշխանության հասնելու համար։ Կուսակցական քեֆերի ժամանակ նա ստուգում է թիմ կոչվածի «բարոյահոգեբանական» վիճակը, չափում սեղանակիցների «ֆիզիկական» պատրաստվածությունը, գնահատում քծնանքային կենացների «դոզան» և համապատասխան եզրակացություններ անում։

Երեկ էլ այդպիսի կուսակցական քեֆ–հավաք է տեղի ունեցել Ծաղկաձորում։

ՀՀԿ–ականները և նրանց կցված հաճախորդները գնացել էին՝ չիմանալով, թե ինչու են հրավիրվել, ու ինչ է քննարկվելու։ Սա, ի դեպ, ամբողջությամբ տեղավորվում է Սերժ Սարգսյանի՝ սահմանադրական «բարեփոխումների» միջոցով անհատի դերի նվազեցման ու հորիզոնական–ցանցային համակարգի ներդրման մասին պատկերացումների մեջ։

Ծաղկաձորում բոլորը «ցանցային» տարբերակով հավաքվել էին, որպեսզի տեղում հասկանային, թե անհատն ինչու է իրենց հավաքել։ Ահա այսպիսին են «Վերջի բոլշևիկի» պատկերացումներն անհատի դերի նվազեցման և կոլեգիան կառավարման մակարդակի բարձրացնելու մասին։

Ինչ մնում է քյաբաբախորովածային ծաղկաձորյան հավաքին, ապա դրա հիմնական նպատակը Սերժի՝ ինքն իրեն «դուխ» տալն ու «թիմի» տրամադրությունները ստուգելն էր։

Սերժ Սարգսյանը գիտի, որ իր «կաղ բադի» սինդրոմը խոր անորոշություն է առաջացրել ՀՀԿ–ում։ ՀՀԿ–ում էլ գիտեն, որ Սարգսյանը միայն սահմանադրական փոփոխություններով կարող է կյանքի կոչել իր վերարտադրության ծրագիրը, բայց հանրաքվեն կարող է վերածվել իշխանափոխության գործընթացի։ ՀՀԿ–ում այս ամենը հասկանում են, ու դրա համար էլ ամեն մեկը փորձում է տեղ ման գալ արևի տակ։

Ահա այս անորոշության և փոխադարձ անվստահության պայմաններում էլ կազմակերպվել էր ծաղկաձորյան քյաբաբախորովածային կուսակցական «ժողովը»՝ իսկական խրախճանք ներկուսակցական ժանտախտի պահին։

Սևակ Մինասյան