Այսօրվա ասուլիսին «Սպառողների աջակցման կենտրոն» ՀԿ նախագահ Աշոտ Միրզոյանն անդրադառնալով հոսանքի սակագնի թանկացմանը՝ նշել է, որ ոչ մի երաշխիք չկա, որ նորից թանկացում չի լինի։

Նա նշել է, որ Վրաստանից հոսանք ներկրելու փաստը զարմանք է առաջացրել անգամ քաղաքական ուժերի ներկայացուցիչների շրջանում. «Դա աբսուրդ է։ Հայաստանն, ունենալով ատոմակայան, ջերմաէլեկտրակայաններ, «Հրազդանի» ջէկ, ալտերնատիվ էներգիայի մասին էլ հետո կխոսեմ, Վրաստանից գնում է հոսանք»։

Միրզոյանը լրագրողներին է ներկայացրել ՀԾԿՀ–ի հոսանքի թանկացման որոշումը՝ նշելով, որ որևէ մասնագիտական հիմնավորում նրանում չկա. «Իրենք որոշել են, իրենք էլ ընդունել են, իսկ երրորդ աբսուրդը քվեարկության պրոցեսն էր. Ռոբերտ Նազարյանը՝ հանձնաժողովի նախագահը, դեռ չավարտած իր խոսքը, հանձնաժողովի անդամներն արդեն ձեռքները բարձրացրել էին։ Դա աբսուրդ է. մարդը դեռ չի ասել, վերջացրել իր միտքը, նրանք արդեն համաձայն են», – ինչը, ըստ բանախոսի, նշանակում է, որ ամեն բան նախապես կանխորոշված է եղել։

Միրզոյանի խոսքերով՝ քննարկում հրավիրելը ձևական բնույթ է կրել. հոսանքի թանկացման դեմ հանդես եկողներն իրենց հիմնավորումները բերեցին, իսկ ՀԾԿՀ–ն արհամարհեց. «Ձևական բնույթով իրենք անցկացրեցին. փաստորեն, քաղաքական պատվեր իրականացրեցին»։

Բանախոսը նշել է նաև, որ զրուցել է մասնագետների հետ խնդրի վերաբերյալ, որոնք, սակայն, խնդրել են իրենց անունը չտալ. «Մարդիկ վախենում են հիմնավորել իրենց ճիշտը»։

Ինչ վերաբերում է հասարակական ակտիվությանը, նա ընդգծել է. «Մենք պետք է միավորվենք, դառնանք բռունցք քաղաքական ուժ։ Հասարակական ուժերը, գիտնականները, որ ընդհանրապես չգիտես՝ որտեղ են... պետք է ամբողջ ժողովուրդը կանգնի, որովհետև մարդիկ լքում են իրենց տունը։ Թվում է՝ եթե մենք կորցնենք Հայաստանը, իրենք Իսպանիայում, կամ, չգիտեմ, Եվրոպայում լավ են ապրելու։ Ճորտի պես են վերաբերվելու նրանց», – ապա հավելել է, որ մեզ երրորդ երկիր են ընկալում. գալիս են ու սովորեցնում, թե հայը Հայաստանում ինչպես պետք է ապրի։