«Nesw.am»–ի հետ զրույցում օֆշորային մեքենայությունների մեջ հայտնվածներից Աշոտ Սուքիասյանի փաստաբանն ասել է հետևյալը. «Օֆշորային սկանդալում ներգրավված, հունիսի 19-ից կալանավորված գործարար Աշոտ Սուքիասյանը նմանակել է նախկին վարչապետ Տիգրան Սարգսյանի եւ Նավասարդ արքեպիսկոպոս Կճոյանի ստորագրությունները, որպեսզի ոչ մեկն իրենից իր բիզնեսը չկարողանա խլել»։

Փաստաբանը նաև ասել է, որ նշյալ մարդկանց Սուքիասյանն ուզեցել է սյուրպրիզ անել։

Նկատենք, որ սրանք սենսացիոն հայտարարություն են, որոնք մի շարք հարցեր են առաջացնում.

1.Ինչու՞ է Սուքիասյանն իր բիզնես–«տանիքն» ապահովելու համար հատկապես այդ մարդկանց ստորագրությունները կեղծել։

2.Ինչի՞ց ելնելով է Սուքիասյանը մտածել, որ եթե կեղծի այժմ արդեն «օղորմաԾիկ» վարչապետի ու «սրբազանի» ստորագրությունները և նրանց «տանիք» դարձնի, ապա այդպիսով կապահովագրի իր բիզնեսը։ Հայտնի՞ է արդյոք նրան մեկ այլ փորձ, երբ Տիգրան Սարգսյանին կամ Նավասարդ Կճոյանին «տանիք» դարձնելով՝ մարդիկ ապահովագրել են իրենց բիզնեսն այլոց ոտնձգություններից։

3.Ինչ որ մեկը հուշե՞լ է Սուքիասյանին այդ մարդկանց «տանիք» դարձնելու հարցում, թե՞ Սուքիասյանն ինքնուրույն է հանգել այն մտքին, որ պետք է Տիգրանին ու Կճոյանին «տանիք» կանգնեցնել։ Եթե ինչ որ մեկը հուշել է նրան գնալ այդ քայլին, ապա ո՞վ է այդ մեկը և ինչի՞ վրա է հիմնված եղել այդ հուշումը։

4. Ի՞նչ սյուրպրիզի մասին է խոսքը։ Սուքիասյանը համոզվա՞ծ է եղել, որ Տիգրանն ու Նավասարդը հաճելիորեն կզարմանան, որ տանը նստած դարձել են ուրիշի միլիոնների տերը։

5.Կա՞ն այլ պաշտոնյաներ, որոնց Սուքիասյանը կրկին ուզեցել է սյուրպրիզ անել։

6.Ո՞ւմ վրա է կասկածել Սուքիասյանը և ումի՞ց է պաշտպանել իր բիզնեսը, որ ստիպված է եղել «տանիք» դարձնել օֆշորային պատմության մյուս մասնակիցներին։

7. Եվ ամենակարևոր ու հռետորական հարցը, որը ոչ միայն Սուքիասյանին է ուղղված. Հայաստանում, ըստ Սուքիասյանի ու իր «օրթախներ» Տիգրան Սարգսյանի և Նավասարդ Կճոյանի, քանի՞ էշ կա, որ կհավատա այն հեքիաթին, թե իբր վերջիններս անտեղյակ են եղել օֆշորային պատմություններից ու ակամայից են իրենց հաշիվների վրա միլիոնավոր դոլարներ ստացել։

Ի դեպ, քանի դեռ չի ավարտվել օֆշորային գործի քննությունը, լավ կլինի ԱՄՆ–ում դեսպան դարձած Տ. Սարգսյանը հրապարակի իրեն սյուրպրիզ մատուցողների ամբո՛ղ ցուցակը։ Դա հետագայում որպես մեղմացուցիչ հանգամանք կդիտարկվի։

Սևակ Մինասյան