Ինչպես արդեն տեղեկացրել էինք, այսօր առավոտվանից «Նաիրիտի» աշխատողները հավաքվել են գործարանի դիմաց, որտեղից երթով շարժվել են Կառավարության շենք։

Քիչ առաջ «7օր»–ի թղթակիցը տեղեկացրեց, որ աշխատողներին է (մոտ 1000) հանդիպել ՀՀ էկոնոմիկայի և բնական պաշարների նախարար Երվանդ Զախարյանը և «ավետել», որ աշխատողներին կվճարվի 1 ամսվա աշխատավարձ, սակայն չի հստակեցրել, թե երբ։ Նախարարը հիշեցրել է երկրի ծանր սոցիալական վիճակը, ապա հավելել, որ մինչ այս պահը «տանը նստածներին» էլ աշխատավարձեր են վճարել այստեղից–այնտեղից հայթայթած վարկերով։ Ինչ վերաբերում է գործարանի հետագա ճակատագրին, ապա, նախարարի խոսքերով, սեպտեմբերի 15–ին վերսկսվելու են բանակցությունները «Ռոսնեֆտի» հետ։ Ե. Զախարյանի անորոշ պատասխանները, սակայն, որևէ կերպ չեն սփոփել ցուցարարներին։ Այնուհետև նրանց մոտ է իջել ՀՀ վարչապետ Հովիկ Աբրահամյանը, որի ձայնն էլ գրեթե լսելի չի եղել։ Մի խումբ աշխատողներ մտել են Կառավարություն՝ ավելի ստույգ տեղեկություններ ստանալու։

Հիշեցնենք, որ «Նաիրիտն» աշխատողներին պարտք է մեկ տարուց էլ ավելի աշխատավարձ, իսկ գործարանի գլխին կուտակված ամպերը շարունակում են թանձրանալ։ Դեռ 2013–ի սեպտեմբերի 3-ին (ի դեպ, «տարօրինակ» զուգադիպությամբ, հենց այդ օրը ՍերԺ Սարգսյանը հայտարարեց, որ Հայաստանն անդամագրվելու է Մաքսային միությանը) «Ռոսնեֆտի» ղեկավար Ի. Սեչինը հայտարարեց, թե պատրաստվում է 500 մլն ներդնել «Նաիրիտում» և վերագործարկել այն: Նախատեսվում էր «Հին Նաիրիտին» կից՝ բացել նոր արտադրամաս, որը զբաղվելու էր անվադողերի արտադրությամբ։

Շուտով կլրանա այդ հայտարարության 1 տարին, իսկ քիմիական հսկան դեռ կաթվածահար է։ Բանն այն է, որ ընկերությունը ցանկանում էր ձեռք բերել գործարանն առանց պարտքերի։ «Նաիրիտի» համախառն պարտքը, մայիսի վերջի դրությամբ, կազմում էր մոտ 400 մլն դոլար: Պարտատերերից են «Հայռուսգազարդը», «Հայաստանի էլեկտրական ցանցերը», հայկական մի քանի բանկեր, ԱՊՀ միջպետական բանկը, մատակարարներ և այլք: Հենց այս հարցի շուրջ էլ կողմերի համաձայնության չգալը բանակցությունները մտցրեց փակուղի։ Տարածված խոսակցությունների համաձայն՝ «Ռոսնեֆտին» այլևս չի հետաքրքրում գործարանը։

7or.am