«Յուքոմ» ընկերությունը տեղեկացնում է, որ երեկ՝ ժամը 20.20 սահմաններում, Բագրատաշենի սահմանակետով դեպի Վրաստան գնացող ընկերության հիմնական մալուխներից երկուսը Վրաստանի Հանրապետության տարածքում մի քանի տեղից վնասվել է, ինչի պատճառով մասնակի խափանվել է Հայաստան մատակարարվող տարանցիկ ինտերնետային կապը։

Շնորհիվ պահուստային գծերի՝ ինտերնետ բաժանորդները ներկա պահին հիմնականում ապահովված են ինտերնետ հասանելիությամբ, իսկ Վրաստանի Հանրապետության տարածքում «Յուքոմ» ընկերության և վրացական կողմի մասնագետների կողմից տարվում են վերանորոգման աշխատանքներ։

«Յուքոմն» արդեն դիմել է վրացական կողմին մալուխների վնասման պատճառների բացահայտման խնդրանքով, ինչի վերաբերյալ լրացուցիչ ինֆորմացիա կտրամադրվի վաղը առավոտյան։

Ներկա պահին «Յուքոմի» բաժանորդների մոտ նկատվում են ինտերնետ հասանելիության խափանումներ: