Այսօրվա ասուլիսին սեքսոլոգ Սևադա Հակոբյանն անդրադառնալով անչափահասների սեռական դաստիարակության խնդիրներին՝ նշել է, որ ՏՏ այս դարում ապատեղեկատվությունը շատ է, և ծնողները պետք է ուշադիր լինեն իրենց երեխաների սեռական դաստիարակության հարցում. «Երբ ազատ են ինֆորմացիոն հոսքերը, պետք է հաշվի առնել, թե ինչ տեղեկատվություն է ստանում դեռահասը»։

Նա նաև հավելել է, որ բավականաչափ տեղեկացված չլինելու պատճառով ամուսնական կյանքում երիտասարդները որոշակի խնդիրների են բախվում։

«Պետք է կանոնակարգում մտցվի, և տարբեր տարիքային խմբերում երեխաներին համապատասխան դաստիարակություն տրվի մասնագետների կողմից», – ասել է մասնագետը։

Հոգեբան Աննա Բադալյանն էլ, շեշտելով ծնողների դերի կարևորությունը, ասել է. «Պետք է հաշվի առնել երեխայի տարիքը, սեռի կայացումը: Երեխան ձևավորվում է ոչ միայն ծնողների ուղղակի կամ անուղղակի դաստիարակությամբ, այլ նաև հասարակության հետ շփումով: Սեռական դաստիարակության հարցում շատ կարևոր է նաև ազգային մտածողությունը: Հաճախ որոշ բաներ ընդօրինակում ենք այլ ազգերից՝ հաշվի չառնելով, որ դա կարող է բոլորովին այլ ազդեցություն ունենալ մեր մտածողության վրա»։

7or.am