Իսկ դուք ասում եք, թե իշխանությունները երկրի առջեւ ծառացած մարտահրավերները հաշվի չեն առնում, կամ չեն կարողանում դիմագրավել այդ մարտահրավերներին:

Ահա, խնդրեմ, ՀՀ կրթության և գիտության նախարար Արմեն Աշոտյանն ընդունել է համացանցում լայն տարածում գտած «Ice Bucket» մարտահրավերը եւ իր ֆեյսբուքյան էջում գրել է.

«Ընդունել եմ մարտահրավերը (Y)։ Առողջություն եմ մաղթում բոլորին:

Սեպտեմբերի 1-ի նախաշեմին կոչ եմ անում օգնել նաև անապահով ընտանիքների երեխաներին՝ դպրոցին նախապատրաստելու համար…»:

Բացի այդ, տեսանյութ է տեղադրել, որում տեսնում ենք նախկին կարմիրշորտիկավոր բազեական Աշոտյանին՝ այս անգամ չալպուտուրիկ շորտիկով:

Մարտահրավերը սառցե լոգանքն է, եւ նա վերոնշյալ տեքստն արտաբերելուց հետո վերցնում է սառցե ջրով լի դույլը եւ շուռ տալիս գլխին:

Սա իսկական սխրանք է, դրա համար էլ նրա ողջ գերատեսչությունը, հանրապետության բոլոր ՀՀԿ-ական մանկավարժներն ու ուսանողներն ամբողջ օրը լայքում էին ու մեկնաբանություններ թողնում Աշոտյանի տեսանյութի ներքո:

Հիացած գրել են. «Կեցցե՛ ամենաերիտասարդ նախարարը, կեցցե՛ կոմպլեքսներ չունեցող նախարարը, կեցցե՛ ամենախիզախ նախարարը»:

Մի խոսքով, բիս ու բրավիսիմո:

Սույն ֆլեշմոբն անցկացվում է ողջ աշխարհում, բարեգործական ակցիա է, որի նպատակն է ուշադրություն հրավիրել Լու Գերիգի հիվանդության վրա (ամիոտրոֆիկ կողմնային սկլերոզ):

Փորձեցի պարզել, թե դա ինչ հիվանդություն է:

Ահա՝ ամիոտրոֆիկ կողմնային սկլերոզ հիվանդությունն առաջացնում է նյարդերի խանգարում, որի դեպքում մարմնի կամայական շարժումները հսկող նյարդային բջիջները վնասվում են եւ չեն հաղորդակցվում մկանների հետ:

Ճիշտ եւ ճիշտ այսօր մեր երկրում տիրող վիճակի նկարագրությունն է:

Այս ախտորոշումը համապատասխանում է այն վիճակին, որում ապրում ենք:

Երկիրն՝ իր բոլոր ինստիտուտներով հանդերձ, կորցրել է առաջ շարժվելու կարողությունը եւ անշարժացել է:

Ավելորդ է ասել, որ նման վիճակի երկիրը հասցրել են Աշոտյանի կուսակցությունը եւ նրա առաջնորդը:

Դե, Աշոտյանն էլ սառույցը լցնելով գլխին՝ դիմագրավում է այս մարտահրավերը՝ փորձելով փրկել երկիրը «կողմնային սկլերոզից»: Բայց դե, կյանքը ցույց է տալիս, որ ավելի շուտ ամիոտրոֆիկ կողմնային սկլերոզով հիվանդները կբուժվեն, քան Հայաստանը ոտքի կկանգնի այս իշխանությունների օրոք։

Այնպես որ, հայ ժողովուրդը պետք է ընդունի մարտահրավերն ու սառը ցնցուղի ֆունկցիա կատարի աշոտյանների և նրանց շեֆի համար։

Կիմա Եղիազարյան