«Իսլամական պետություն» ահաբեկչական խմբավորման ծայրահեղականներն Իրաքում ոճրագործություններ են կատարում, որոնք կարող են գնահատվել որպես հանցագործություն մարդկության դեմ, մինչդեռ նրանց դիմակայող կառավարական զորքերի ու կամավորական ձևավորումների գործողությունները կարելի է սահմանել որպես «ռազմական հանցագործություն»։ Այս մասին հայտարարել է ՄԱԿ–ի մարդու իրավունքների հարցերով գլխավոր կոմիսարի տեղակալ Ֆլավիա Պանզիերին ՄԱԿ–ի խորհրդի մարդու իրավունքների հարցերով հատուկ նիստի բացման ժամանակ՝ նվիրված Իրաքում տիրող իրավիճակին։

Պանզիրեին ընդգծել է՝ ԻՊ իսլամիստները և նրանց հետ կապված խմբավորումները «նապատակաուղղված էթնիկ և կրոնական խմբերի դեմ կատարում են լայնամասշտաբ և պարբերական հետապնդում՝ զրկելով նրանց հիմնարար, ներառյալ՝ կյանքի և դավանանքի ազատության իրավունքներից»։

Ինչ վերաբերում է կառավարական զորքերի ու կամավորական ձևավորումների գործողություններին, ապա Պանզիրեին նշել է, որ նրանք «մարդու իրավունքները և մարդասիրական իրավունքն են ոտնահարել, որը կարող է գնահատվել որպես ռազմական հանցագործություն»։

Ներկայումս Իրաքի հայցով կազմակերպված հատուկ նստաշրջանում ելույթ են ունենում պատվիրակությունները։ Նիստը պետք է ավարտվի բանաձևի ընդունմամբ։

Տեղեկացնում է «ԻՏԱՌ–ՏԱՍՍ»–ը։